വേനലവധി കഴിഞ്ഞുളള ലോകായുക്ത സിറ്റിങ് 18ന് ആരംഭിക്കും

തിരുവനന്തപുരം: വേനലവധി കഴിഞ്ഞുളള കേരള ലോകായുക്തയുടെ സിറ്റിങ് ഈമാസം 18ന് ആരംഭിക്കും. കൊവിഡ്-19 വ്യാപനത്തിന്റെ പശ്ചാത്തലത്തില്‍ മെയ് 21, 22 ദിവസങ്ങളില്‍ ഡിവിഷന്‍ ബെഞ്ചും സിംഗിള്‍ ബെഞ്ചും സിറ്റിങ് നടത്തും. അടിയന്തരപ്രാധാന്യമുള്ള കേസുകള്‍ മാത്രമേ പരിഗണിക്കുകയുള്ളൂ. അപ്രകാരം പരിഗണിക്കേണ്ട കേസുകള്‍ സംബന്ധിച്ച വിവരം ലോകായുക്തയുടെ രജിസ്ട്രിയില്‍ ബന്ധപ്പെട്ട കക്ഷികള്‍/ അഭിഭാഷകര്‍ എന്നിവര്‍ ഈമാസം 19ന് വൈകീട്ട് 3 മന്നിക്ക് മുമ്പായി എതിര്‍കക്ഷികള്‍ക്ക് നോട്ടീസ് നല്‍കിയ ശേഷം അറിയിക്കേണ്ടതാണ്.

21നും 22നും പോസ്റ്റുചെയ്ത കേസുകളുടെ വിവരം 20ന് വെബ്സൈറ്റില്‍ പ്രസിദ്ധീകരിക്കും. കൊവിഡ്-19 വ്യാപനം തടയുന്നതിനായി കേന്ദ്ര- സംസ്ഥാന സര്‍ക്കാരുകള്‍ പുറപ്പെടുവിച്ചിട്ടുള്ള മാര്‍ഗനിര്‍ദേശങ്ങള്‍ കര്‍ശനമായി പാലിച്ചാവും സിറ്റിങ്ങുകള്‍ നടത്തുന്നത്. 25 മുതല്‍ 28 വരെയുള്ള തൃശൂരിലെയും കോട്ടയത്തെയും ക്യാംപ് സിറ്റിംങ്ങുകളുണ്ടായിരിക്കുന്നതല്ല. ക്യാംപ് സിറ്റിങ്ങില്‍ പോസ്റ്റുചെയ്ത കേസുകളില്‍ അടിയന്തരസ്വഭാവമുള്ളവ ബന്ധപ്പെട്ട കക്ഷികള്‍/ അഭിഭാഷകര്‍ ആവശ്യപ്പെടുകയാണെങ്കില്‍ തിരുവനന്തപുരത്തെ സിറ്റിങ്ങില്‍ പരിഗണിക്കുമെന്ന് ലോകായുക്ത വ്യക്തമാക്കി.