മക്കള്‍ക്ക് വിഷം നല്‍കി ആത്മഹത്യക്ക് ശ്രമിച്ച യുവതി മരിച്ചു

കണ്ണൂര്‍: മക്കള്‍ക്ക് ഐസ്‌ക്രീമില്‍ വിഷം കലര്‍ത്തി നല്‍കി ആത്മഹത്യക്ക് ശ്രമിച്ച യുവതി ചികില്‍സിരിക്കെ മരിച്ചു. പയ്യാവൂര്‍ പൊന്നും പറമ്പില്‍ സ്വപ്ന അനീഷ് ആണ് മരിച്ചത്. വിഷം കഴിച്ച് ഇവരുടെ ഇളയകുട്ടി അന്‍സില (3) നേരത്തെ മരിച്ചിരുന്നു. 13 വയസുള്ള മൂത്ത കുട്ടി ഗുരുതരാവസ്ഥയിലാണ്.

ഓഗസ്റ്റ് 27ന് രാത്രിയാണ് സ്വപ്ന പെണ്‍മക്കളായ ആന്‍സീനയ്ക്കും അന്‍സിലയ്ക്കും ഐസ്‌ക്രീമില്‍ വിഷം ചേര്‍ത്ത് നല്‍കി ആത്മഹത്യക്കു ശ്രമിച്ചത്. പിറ്റേന്ന് സ്വപ്ന തന്നെയാണ് നാട്ടുകാരെയും പൊലീസിനെയും വിവരം അറിയിച്ചത്‌. ആശുപത്രിയില്‍ എത്തിക്കുമ്പോള്‍ അബോധാവസ്ഥയിലായിരുന്ന ഇള കുഞ്ഞിന്റെ വൃക്കയുടെ പ്രവര്‍ത്തനം വഷളായതോടെ കോഴിക്കോട്ടേക്കു മാറ്റിയെങ്കിലും ജീവന്‍ രക്ഷിക്കാന്‍ കഴിഞ്ഞില്ല.

പയ്യാവൂരില്‍ തുണിക്കട നടത്തി വരികയായിരുന്ന സ്വപ്നയുടെ ഭര്‍ത്താവ് ഇസ്രായേലിലാണ്. ആത്മഹത്യക്ക് കാരണം കടബാധ്യതയാണെന്നാണ് സൂചന.