വാട്‌സ്ആപ്പിന് വമ്പന്‍ രൂപഭാവ മാറ്റം; ഐക്കണ്‍ നിറവും തീമും കസ്റ്റമൈസ് ചെയ്യാനുള്ള ഫീച്ചറുകള്‍

കാലിഫോര്‍ണിയ: വാട്‌സ്ആപ്പ് ഉപയോക്താക്കള്‍ക്ക് ആപ്പ് ഐക്കണിന്റെയും തീമുകളുടെയും നിറം സ്വമേധയാ തിരഞ്ഞെടുക്കാനുള്ള സൗകര്യം ഒരുക്കാന്‍ മെറ്റ പദ്ധതിയിടുന്നതായി റിപോര്‍ട്ട്. ആന്‍ഡ്രോയിഡ് പതിപ്പില്‍ വികസിപ്പിച്ചുകൊണ്ടിരിക്കുന്ന ഈ ഫീച്ചറുകള്‍ ബീറ്റാ ടെസ്റ്റിംഗ് ഘട്ടത്തില്‍ കണ്ടെത്തിയതായി ഫീച്ചര്‍ ട്രാക്കറായ വാബീറ്റ ഇന്‍ഫോ അറിയിച്ചു.

വാട്‌സ്ആപ്പ് ബീറ്റാ ഫോര്‍ ആന്‍ഡ്രോയ്ഡ് വേര്‍ഷന്‍ 2.26.6.1ലാണ് പുതിയ സവിശേഷതകള്‍ പരീക്ഷിക്കുന്നത്. നിലവില്‍ ഈ പതിപ്പ് ഡെവലപ്പര്‍മാര്‍ക്കും തിരഞ്ഞെടുത്ത ടെസ്റ്റര്‍മാര്‍ക്കും മാത്രമാണ് ലഭ്യമാക്കിയിരിക്കുന്നത്. പൊതുജനങ്ങള്‍ക്ക് ഇത് ലഭ്യമല്ലെങ്കിലും വരാനിരിക്കുന്ന അപ്‌ഡേറ്റുകളില്‍ അവതരിപ്പിക്കാനുള്ള സാധ്യതയുണ്ടെന്നാണ് സൂചന. വര്‍ഷങ്ങളായി പച്ച നിറത്തെ ആസ്പദമാക്കിയ ബ്രാന്‍ഡിംഗ് പിന്തുടര്‍ന്നിരുന്ന വാട്‌സ്ആപ്പ്, കൂടുതല്‍ വ്യക്തിഗത അനുഭവം നല്‍കുന്നതിനായി ദൃശ്യരൂപത്തില്‍ വൈവിധ്യം കൊണ്ടുവരാനാണ് നീക്കം. ഉപയോക്താക്കള്‍ക്ക് തങ്ങളുടെ ഇഷ്ടാനുസരണം ആപ്പിന്റെ രൂപഭാവം മാറ്റാനാവുന്ന രീതിയിലാണ് പുതിയ സംവിധാനം രൂപകല്‍പ്പന ചെയ്യുന്നത്.

റിപോര്‍ട്ടുകള്‍ പ്രകാരം 14 വ്യത്യസ്ത ആപ്പ് ഐക്കണുകളാണ് അവതരിപ്പിക്കാന്‍ പദ്ധതിയിടുന്നത്. ഇതില്‍ നീല, തവിട്ട്, പച്ച, മോണോക്രോം, ഓറഞ്ച്, പിങ്ക്, പര്‍പ്പിള്‍ എന്നീ ഏകവര്‍ണ്ണ ഡിസൈനുകള്‍ ഉള്‍പ്പെടും. കൂടാതെ 'അറോറ', 'ഫ്‌ലഫി', 'ഗാലക്‌സി', 'ക്ലേ', 'സ്പാര്‍ക്കിള്‍', 'നിയോണ്‍' എന്നീ പേരുകളിലുള്ള സ്‌റ്റൈലിഷ് ഡിസൈനുകളും ലഭ്യമാകും. ഈ ഐക്കണുകള്‍ ഉപയോഗിച്ച് ഹോം സ്‌ക്രീനിലും ആപ്പ് ഡ്രോയറിലും വാട്‌സ്ആപ്പിന്റെ രൂപഭാവം മാറ്റാനാകും. മൂന്നാം കക്ഷി ആപ്പുകളുടെ സഹായമില്ലാതെ തന്നെ ഐക്കണ്‍ രൂപഭാവം ക്രമീകരിക്കാനാകുന്നതാണ് പ്രത്യേകത.

ഐക്കണുകള്‍ക്ക് പുറമെ ആപ്പിന്റെ പ്രധാന ബ്രാന്‍ഡിംഗ് നിറവും മാറ്റാനുള്ള സൗകര്യം ഉള്‍പ്പെടുത്താന്‍ സാധ്യതയുണ്ട്. ഡിഫോള്‍ട്ട് പച്ചയ്‌ക്കൊപ്പം 19 വരെ നിറങ്ങള്‍ തിരഞ്ഞെടുക്കാനാകുമെന്നാണ് റിപോര്‍ട്ട്. റോയല്‍ ബ്ലൂ, വയലറ്റ്, കോറല്‍, ടീല്‍, തവിട്ട്, ബീജ്, മഞ്ഞ, പിങ്ക്, ചുവപ്പ്, ഓറഞ്ച്, ഡാര്‍ക്ക് ഒലീവ് ഗ്രീന്‍ തുടങ്ങിയ നിറങ്ങള്‍ ഉള്‍പ്പെടാം. പഴയ ക്ലാസിക് ഡിസൈന്‍ തിരികെ കൊണ്ടുവരാനുള്ള സാധ്യതയും നിഷേധിക്കപ്പെടുന്നില്ല. തിരഞ്ഞെടുക്കുന്ന നിറങ്ങള്‍ ടാബുകള്‍, ഫില്‍റ്ററുകള്‍, ഫ്‌ലോട്ടിംഗ് ആക്ഷന്‍ ബട്ടണുകള്‍ തുടങ്ങിയ ഇന്റര്‍ഫേസ് ഘടകങ്ങളില്‍ പ്രതിഫലിക്കും. ഇതിലൂടെ ആപ്പിന്റെ മുഴുവന്‍ ഭാഗത്തും ഏകോപിതമായ തീം അനുഭവം ഉറപ്പാക്കാനാകും. പുതിയ ഫീച്ചറുകളുടെ ഔദ്യോഗിക ലോഞ്ച് തിയ്യതി പ്രഖ്യാപിച്ചിട്ടില്ല. ഉപയോക്തൃ അനുഭവം കൂടുതല്‍ വ്യക്തിഗതമാക്കുന്നതിനുള്ള വാട്‌സ്ആപ്പിന്റെ പ്രധാന നീക്കമായി ഈ അപ്‌ഡേറ്റ് വിലയിരുത്തപ്പെടുന്നു.