വിയ്യൂരില്‍ തടവുകാരന്‍ ചാടിപ്പോയ സംഭവം: ബാലമുരുകന്‍ കേരളം വിട്ടെന്ന് സൂചന, തൃശൂരില്‍ നിന്നുള്ള പോലിസ് സംഘം തമിഴ്‌നാട്ടിലേക്ക്

തൃശൂര്‍: വിയ്യൂര്‍ ജയില്‍ പരിസരത്തുനിന്ന് തമിഴ്‌നാട് പോലിസിന്റെ പിടിയില്‍ നിന്നും ചാടിപ്പോയ ബാലമുരുകന്‍ കേരളം വിട്ടെന്ന് സൂചന. ബന്തക്കുടിയിലെ കേസുമായി ബന്ധപ്പെട്ടാണ് ശനിയാഴ്ച വിയ്യൂര്‍ ജയിലില്‍ നിന്ന് തമിഴ്നാട് പോലിസ് ഇയാളെ കൊണ്ടു പോയത്. എസ്ഐ നാഗരാജനും രണ്ടു പോലിസുകാരും ചേര്‍ന്ന് തിരികെയെത്തിക്കുമ്പോഴാണ് പ്രതി ചാടിപ്പോയത്.

പ്രതിയ്ക്കായി തെങ്കാശി, പൊള്ളാച്ചി ഉള്‍പ്പെടെ തമിഴ്‌നാട്ടിലെ വിവിധയിടങ്ങള്‍ കേന്ദ്രീകരിച്ചുള്ള പരിശോധനയ്ക്ക് തൃശൂരില്‍ നിന്നുള്ള പോലിസ് സംഘം തമിഴ്‌നാട്ടിലേക്ക് തിരിക്കും. കേരള പോലിസിനൊപ്പം തമിഴ്‌നാട്ട് പോലിസും തിരച്ചിലിനെത്തും. അതേസമയം തമിഴ്‌നാട് പോലിസിനൊപ്പം ബാലമുരുകന്‍ ആലത്തൂരില്‍ നിന്നും ഭക്ഷണം കഴിച്ച ഹോട്ടലിലെ ദൃശ്യങ്ങള്‍ പുറത്തുവന്നു. ഭക്ഷണം കഴിച്ച ശേഷം പുറത്തിറങ്ങുമ്പോള്‍ ബാലമുരുകന് കൈവിലങ്ങില്ല.

കഴിഞ്ഞ ദിവസമാണ് തമിഴ്നാട് പോലിസിന്റെ കസ്റ്റഡിയില്‍ നിന്ന് ബാലമുരുകന്‍ ചാടിപ്പോകുന്നത്. കൊലപാതകം ഉള്‍പ്പെടെ 53 കേസുകളിലെ പ്രതിയാണ് തെങ്കാശി സ്വദേശിയായ ബാലമുരുകന്‍. ഇയാളെ തമിഴ്നാട് പോലിസ് വളരെ അശ്രദ്ധമായാണ് പുറത്തിറക്കുന്നതെന്ന് തെളിയിക്കുന്നതാണ് പുറത്തുവന്ന ദൃശ്യങ്ങള്‍. മറയൂരിലെ മോഷണക്കേസിലും ബാലമുരുകന്‍ പ്രതിയാണ്.