ആണവശേഷിയുള്ള മിനുട്ട്മാന്‍ 3 'ഡൂംസ്ഡേ' ഭൂഖണ്ഡാന്തര ബാലിസ്റ്റിക് മിസൈല്‍ പരീക്ഷിച്ച് അമേരിക്ക

വാഷിങ്ടണ്‍: ആണവശേഷിയുള്ള മിനുട്ട്മാന്‍ 3 'ഡൂംസ്ഡേ' ഭൂഖണ്ഡാന്തര ബാലിസ്റ്റിക് മിസൈല്‍ വിജയകരമായി പരീക്ഷിച്ച് അമേരിക്ക.ചൊവ്വാഴ്ച രാത്രി കാലിഫോര്‍ണിയയിലെ വാന്‍ഡന്‍ബെര്‍ഗ് സ്‌പേസ് ഫോഴ്‌സ് ബേസില്‍ നിന്നാണ് യുഎസ് എയര്‍ഫോഴ്‌സ് ഗ്ലോബല്‍ സ്‌ട്രൈക്ക് കമാന്‍ഡ് മിസൈല്‍ വിക്ഷേപിച്ചതെന്ന് യുഎസ് സ്‌പേസ് ഫോഴ്‌സ് പ്രസ്താവനയില്‍ അറിയിച്ചു. രണ്ട് ടെസ്റ്റ് റീ-എന്‍ട്രി വെഹിക്കിളുകള്‍ മിസൈലില്‍ സജ്ജീകരിച്ചിരുന്നു. ആയുധങ്ങള്‍ ഘടിപ്പിക്കാത്ത നിലയിലായിരുന്നു പരീക്ഷണം.

ഹിരോഷിമയില്‍ പ്രയോഗിച്ച ആറ്റം ബോംബിനേക്കാള്‍ 20 മടങ്ങ് കൂടുതല്‍ പ്രഹരശേഷിയുള്ള യുദ്ധമുനകള്‍ വഹിക്കാന്‍ ശേഷിയുള്ളതാണ് ഈ മിസൈല്‍. ഇതോടെ, ലോകരാജ്യങ്ങള്‍ക്കിടയില്‍ വലിയ ചര്‍ച്ചകള്‍ക്ക് അമേരിക്ക വഴിമരുന്നിട്ടു.

നിലവില്‍ പശ്ചിമേഷ്യയില്‍ നടക്കുന്ന സംഘര്‍ഷങ്ങളുമായി ഈ പരീക്ഷണത്തിന് ഔദ്യോഗികമായി ബന്ധമില്ലെന്നും കാലങ്ങളായി തുടരുന്ന പതിവ് പരീക്ഷണങ്ങളുടെ ഭാഗമാണിതെന്നുമാണ് അമേരിക്കയുടെ പ്രതികരണം.