തടവുകാരുടെ ഫോണ്‍ വിളിക്ക് ഒത്താശ: വിയ്യൂര്‍ ജയില്‍ സൂപ്രണ്ട് എജി സുരേഷിനെ സസ്‌പെന്റ് ചെയ്തു

തിരുവനന്തപുരം: തടവുകാര്‍ക്ക് സൂപ്രണ്ട് ഓഫിസില്‍ നിന്നും പോലും ഫോണ്‍ ചെയ്യാന്‍ അവസരമൊരുക്കിയ വിയ്യൂര്‍ ജയില്‍ സൂപ്രണ്ട് എജി സുരേഷിനെ സസ്‌പെന്റ് ചെയ്തു. ഗുരുതര ആരോപണമുയര്‍ന്ന പശ്ചാത്തലത്തില്‍ സൂപ്രണ്ടിനെ സസ്‌പെന്റ് ചെയ്യണമെന്ന് ജയില്‍ ഡിജിപി ഷെയ്ഖ് ദര്‍വേശ് സാഹിബ് ഫയലില്‍ രേഖപ്പെടുത്തിയിരുന്നു.

സൂപ്രണ്ട് സര്‍ക്കാര്‍ വിരുദ്ധ പ്രവര്‍ത്തനങ്ങള്‍ക്ക് കൂട്ടുനിന്നു എന്നതടക്കമുള്ള ആരോപണങ്ങള്‍ ഉള്‍പ്പെടുന്ന റിപോര്‍ട്ടാണ് ഡിഐജി എംകെ വിനോദ് കുമാര്‍ ജയില്‍ മേധാവിക്ക് കൈമാറിയത്.

സൂപ്രണ്ടിന്റെ ഓഫിസിലിരുന്ന് പോലും പ്രതികള്‍ ഫോണ്‍ വിളിച്ചെന്നും റിപോര്‍ട്ടിലുണ്ട്. ജയിലില്‍ തടവുകാരുടെ നിരന്തരഫോണ്‍ വിളിയുണ്ടെന്നു കണ്ടെത്തിയ സാഹചര്യത്തില്‍ ജയില്‍ ഡിജിപി പരിശോധന നടത്തിയിരുന്നു. ഉദ്യോഗസ്ഥരുടെ സഹായത്തോടെയാണോ തടവുകാര്‍ക്ക് സൗകര്യം ലഭിക്കുന്നതെന്നും ജയില്‍ ഡിജിപി പരിശോധിച്ചു.

നേരത്തെ ടിപി വധക്കേസ് പ്രതിയായ കൊടി സുനിയില്‍ നിന്ന് ഫോണ്‍ പിടിച്ചെടുക്കുകയും പല തവണ ഗുണ്ടകളെ അടക്കം സുനി ജയിലില്‍ വിളിച്ചെന്നും കണ്ടെത്തിയിരുന്നു. കൊലപാതക കേസില്‍ തടവില്‍ കഴിയുന്ന റഷീദ് 223 മൊബൈല്‍ നമ്പറുകളിലേക്ക് 1345 തവണ ഫോണ്‍ വിളിച്ചിരുന്നതായി അധികൃതര്‍ കണ്ടെത്തി. ഇതേ ഫോണില്‍ നിന്ന് മറ്റു തടവുകാരും വിളിച്ചിട്ടുണ്ട്.