അഗസ്റ്റ വെസ്റ്റ്‌ലാന്‍ഡ് കേസ്: സോണിയക്കും രാഹുലിനും സുരക്ഷാ കവചമൊരുക്കി എ കെ ആന്റണി

ന്യൂഡല്‍ഹി: അഗസ്റ്റ വെസ്റ്റ്‌ലാന്‍ഡ് കേസില്‍ പ്രതികൂട്ടില്‍നില്‍ക്കുന്ന സോണിയാ ഗാന്ധിക്കും രാഹുല്‍ ഗാന്ധിക്കും പ്രതിരോധ കവചമൊരുക്കി മുന്‍ പ്രതിരോധമന്ത്രി എ കെ ആന്റണി. താന്‍ പ്രതിരോധ മന്ത്രിയായിരിക്കെ ഒപ്പിട്ട അഗസ്റ്റ വെസ്റ്റലാന്റ് കരാറിന്റെ ഒരു ഘട്ടത്തില്‍ പോലും സോണിയാ ഗാന്ധിയും രാഹുല്‍ ഗാന്ധിയും ഇടപെട്ടിട്ടില്ല.-ആന്റണി വ്യക്തമാക്കി.

കരാറില്‍ ക്രമക്കേടുണ്ടെന്നറിഞ്ഞ നിമിഷം തന്നെ സിബിഐ അന്വേഷണത്തിനു താന്‍ ഉത്തരവിട്ടതായും ആന്റണി വ്യക്തമാക്കി. അഗസ്റ്റ വെസ്റ്റ്‌ലാന്‍ഡ് കേസില്‍ ഗീബല്‍സിനെ പോലും വെല്ലും വിധമാണു കേന്ദ്ര സര്‍ക്കാര്‍ നുണ പ്രചാരണം നടത്തുന്നത്. ഇതിനായി ഏജന്‍സികളെ കേന്ദ്രം ദുരുപയോഗപ്പെടുത്തുകയാണ്.

ഇറ്റലിയിലെ മിലാന്‍ കോടതിയില്‍ കേസ് നടത്തി കരാര്‍ തുകയും മൂന്നു ഹെലികോപ്റ്ററുകളും യുപിഎ സര്‍ക്കാര്‍ തിരിച്ചുപിടിച്ചു. അഗസ്റ്റ വെസ്റ്റ്‌ലാന്‍ഡ് കമ്പനിയെ കരിമ്പട്ടികയില്‍പ്പെടുത്താനും താന്‍ ഉത്തരവിട്ടു. എന്നാല്‍, പിന്നീടു വന്ന മോദി സര്‍ക്കാര്‍ കരിമ്പട്ടികയില്‍നിന്ന് കമ്പനിയെ ഒഴിവാക്കി. ബെംഗളൂരുവിലെ എയ്‌റോ ഇന്ത്യ ഷോയില്‍ കമ്പനിയുടെ മാതൃസ്ഥാപനമായ ഫിന്‍മെക്കാനിക്കയ്ക്കു പങ്കെടുക്കാനും അവസരം നല്‍കി.

കേന്ദ്ര അന്വേഷണ ഏജന്‍സികളെ ഉപയോഗിച്ചു പ്രതികാര രാഷ്ട്രീയം കളിക്കുകയാണു ബിജെപി. റഫാല്‍ കേസില്‍ ജെപിസി അന്വേഷണത്തിനു പോലും വഴങ്ങാത്തവരാണ് അഗസ്റ്റ കേസില്‍ വ്യാജ ആരോപണങ്ങളുമായി രംഗത്തിറങ്ങുന്നത്. ഇത് ശ്രദ്ധതിരിച്ചുവിടാനാണ്. ഇറ്റലിയുമായി കേസിനു പോവുകയും അതില്‍ വിജയിക്കുകയും ചെയ്തതായും അദ്ദേഹം കൂട്ടിച്ചേര്‍ത്തു.