തമിഴ്‌നാട് ഗവര്‍ണര്‍ക്ക് തിരിച്ചടി; നിയമസഭ പാസാക്കുന്ന ബില്ലുകള്‍ ഗവര്‍ണര്‍ക്ക് പിടിച്ചു വയ്ക്കാനാവില്ലെന്ന് സുപ്രിംകോടതി

ന്യൂഡല്‍ഹി: നിയമസഭ പാസാക്കുന്ന ബില്ലുകള്‍ ഗവര്‍ണര്‍ക്ക് പിടിച്ചുവെക്കാനാകില്ലെന്ന് സുപ്രിംകോടതി. എം കെ സ്റ്റാലിന്റെ നേതൃത്വത്തിലുള്ള തമിഴ്നാട് സര്‍ക്കാരുമായി ബന്ധപ്പെട്ട കേസിലാണ് വിധി. 10 പ്രധാന ബില്ലുകള്‍ക്ക് അനുമതി നല്‍കാതിരിക്കാനുള്ള ഗവര്‍ണര്‍ ആര്‍ എന്‍ രവിയുടെ തീരുമാനം 'നിയമവിരുദ്ധവും' 'ഏകപക്ഷീയവു'മാണെന്ന് കോടതി പറഞ്ഞു. അനുമതി നല്‍കിയ ശേഷം ഗവര്‍ണര്‍ക്ക് രാഷ്ട്രപതിക്ക് ബില്ലുകള്‍ മാറ്റിവയ്ക്കാന്‍ കഴിയില്ലെന്ന് കോടതി വിധിച്ചു.

'10 ബില്ലുകള്‍ രാഷ്ട്രപതിക്കായി മാറ്റിവെച്ച ഗവര്‍ണറുടെ നടപടി നിയമവിരുദ്ധവും ഏകപക്ഷീയവുമാണ്. അതിനാല്‍, നടപടി റദ്ദാക്കുന്നു. 10 ബില്ലുകള്‍ക്കായി ഗവര്‍ണര്‍ സ്വീകരിച്ച എല്ലാ നടപടികളും റദ്ദാക്കുന്നു. ഈ ബില്ലുകള്‍ ഗവര്‍ണര്‍ക്ക് വീണ്ടും സമര്‍പ്പിച്ച തീയതി മുതല്‍ പാസാക്കിയതായി കണക്കാക്കും,' ജസ്റ്റിസ് ജെ ബി പര്‍ദിവാല, ജസ്റ്റിസ് ആര്‍ മഹാദേവന്‍ എന്നിവരടങ്ങിയ ബെഞ്ച് പറഞ്ഞു. ഗവര്‍ണര്‍ രവി 'സദ്ഭാവത്തോടെ' പ്രവര്‍ത്തിച്ചില്ലെന്ന് കോടതി കൂട്ടിചേര്‍ത്തു.

നിയമസഭ വീണ്ടും പാസാക്കിയ ബില്ലുകള്‍ വീണ്ടും അവതരിപ്പിക്കുമ്പോള്‍ ഗവര്‍ണര്‍ അവ പാസാക്കണമായിരുന്നുവെന്നും ബെഞ്ച് പറഞ്ഞു.ഗവര്‍ണര്‍ക്ക് ബില്ല് രാഷ്ട്രപതിയുടെ പരിഗണനയ്ക്കായി മാറ്റിവയ്ക്കാന്‍ കഴിയും. ചില വ്യവസ്ഥകള്‍ പുനഃപരിശോധിക്കുന്നതിനായി ഗവര്‍ണര്‍ക്ക് ബില്ല് സഭയിലേക്കോ സഭകളിലേക്കോ തിരിച്ചയയ്ക്കാം. സഭ വീണ്ടും പാസാക്കിയാല്‍, ഗവര്‍ണര്‍ക്ക് ബില്ല് തടഞ്ഞുവെക്കാനാകില്ല.

ഭരണഘടനയ്ക്കോ, സംസ്ഥാന നയത്തിന്റെ നിര്‍ദ്ദേശക തത്വങ്ങള്‍ക്കോ വിരുദ്ധമാണെന്ന് തോന്നുന്നതോ, ദേശീയ പ്രാധാന്യമുള്ളതോ ആയ ഒരു ബില്ല് രാഷ്ട്രപതിയുടെ പരിഗണനയ്ക്കായി സമര്‍പ്പിക്കണം.

ഈ ഓപ്ഷനുകള്‍ വിനിയോഗിക്കുന്നതിനുള്ള സമയപരിധികളെകുറിച്ചും കോടതി വ്യക്തമാക്കി. ഈ സമയപരിധികള്‍ ഒഴിവാക്കുന്നത് ഗവര്‍ണറുടെ നടപടിയുടെ ജുഡീഷ്യല്‍ പരിശോധനയ്ക്ക് കാരണമാകുമെന്ന് പറഞ്ഞു. ഗവര്‍ണര്‍മാര്‍ക്ക് ഒരു ബില്ലിന് അനുമതി നല്‍കാതിരിക്കാനും മന്ത്രിസഭയുടെ സഹായത്തോടെ രാഷ്ട്രപതിയുടെ അവലോകനത്തിനായി മാറ്റിവയ്ക്കാനും കോടതി ഒരു മാസത്തെ സമയപരിധി നിശ്ചയിച്ചിട്ടുണ്ട്. മന്ത്രിസഭയുടെ സഹായവും ഉപദേശവും ഇല്ലാതെ ഒരു ബില്ല് മാറ്റിവയ്ക്കുമ്പോള്‍, ഈ സമയപരിധി മൂന്ന് മാസമായിരിക്കും. സംസ്ഥാന നിയമസഭ പുനഃപരിശോധിച്ച ശേഷം ഒരു ബില്ല് ഒരു ഗവര്‍ണര്‍ക്ക് സമര്‍പ്പിക്കുകയാണെങ്കില്‍, ഒരു മാസത്തിനുള്ളില്‍ അദ്ദേഹംഅത് അംഗീകരിക്കണം. ആര്‍ട്ടിക്കിള്‍ 200 പ്രകാരം ഗവര്‍ണറുടെ ഏതൊരു നടപടിയും ജുഡീഷ്യല്‍ അവലോകനത്തിന് വിധേയമാണെന്ന് കോടതി പറഞ്ഞു.

ഒരു തരത്തിലും ഗവര്‍ണറുടെ അധികാരങ്ങളെ ദുര്‍ബലപ്പെടുത്തുന്നതല്ല ഈ വിധി എന്നും ഗവര്‍ണറുടെ എല്ലാ നടപടികളും പാര്‍ലമെന്ററി ജനാധിപത്യ തത്വവുമായി പൊരുത്തപ്പെടണമെന്നും കോടതി വ്യക്തമാക്കി.