സംസ്ഥാനത്ത് മറ്റ് പെന്ഷനില്ലാത്തവര്ക്ക് 1,000 രൂപ സഹായം; ഗുണഭോക്താക്കള് 14,78,236 കുടുംബങ്ങള്
തിരുവനന്തപുരം: സംസ്ഥാനത്ത് സാമൂഹ്യക്ഷേമ പെന്ഷനോ വെല്ഫയര് ഫണ്ട് പെന്ഷനോ ലഭിക്കാത്തവര്ക്കുള്ള സാമ്പത്തിക സഹായത്തിനുള്ള മാര്ഗ നിര്ദേശങ്ങള് പുറപ്പെടുവിച്ചു. ബിപിഎല് പട്ടികയില് ഉള്പ്പെട്ടവര്ക്കും അന്ത്യോദയ അന്നയോജന പദ്ധതിയില് ഉള്പ്പെട്ടവര്ക്കും ആയിരം രൂപ സഹായം ലഭിക്കും. സംസ്ഥാന സര്ക്കാര് പ്രഖ്യാപിച്ച സാമ്പത്തിക കൈത്താങ്ങ് സഹകരണ സംഘങ്ങള് വഴി ഓണത്തിനു മുമ്പ് വിതരണം നടത്താനുള്ള പ്രത്യേക നിര്ദേശം സഹകരണ മന്ത്രി വി.എന്. വാസവന് നല്കി. സംസ്ഥാനത്ത് 14,78,236 കുടുംബങ്ങള്ക്കാണ് സഹായം ലഭിക്കുന്നത്.
ഇതിനായി 147,82,36,000 രൂപ വകയിരുത്തി. ഗുണഭോക്താക്കളുടെ പട്ടിക ജില്ലാ അടിസ്ഥാനത്തില് തദ്ദേശ സ്ഥാപനം തിരിച്ച് ജോയിന്റ് രജിസ്ട്രാര്മാര്ക്ക് അടിയന്തരമായി ലഭ്യമാക്കും.
ഗുണഭോക്താവിന് ആധാര് കാര്ഡോ, മറ്റേതെങ്കിലും തിരിച്ചറിയല് രേഖകളോ ഹാജരാക്കി സഹായം കൈപ്പറ്റാം. സഹായ വിതരണം നടത്തുന്ന സഹകരണ സംഘങ്ങള് കൊവിഡ് മാനദണ്ഡങ്ങള് പൂര്ണമായും പാലിക്കണം. ആവശ്യമായ മുന്കരുതല് നടപടികള് സ്വീകരിച്ചായിരിക്കണം സഹായ വിതരണം നടത്തേണ്ടതെന്നും മന്ത്രിയുടെ നിര്ദ്ദേശ പ്രകാരം സഹകരണ സംഘം രജിസ്ട്രാര് പുറപ്പെടുവിച്ച സര്ക്കുലറില് വ്യക്തമാക്കിയിട്ടുണ്ട്.
