റെനില്‍ വിക്രമസിംഗെ ശ്രീലങ്കന്‍ പ്രധാനമന്ത്രിയായി സത്രപ്രതിജ്ഞ ചെയ്തു

കൊളംബോ: ആഭ്യന്തര കലാപം രൂക്ഷമായ ശ്രീലങ്കയില്‍ യുഎന്‍പി നേതാവ് റെനില്‍ വിക്രമസിംഗെ പ്രധാനമന്ത്രിയായി സത്യപ്രതിജ്ഞ ചെയ്തു. പ്രസിഡന്റ് ഗോടബയ രാജപക്‌സെയാണ് സത്യപ്രതിജ്ഞാച്ചടങ്ങുകള്‍ക്ക് നേതൃത്വം നല്‍കിയത്. ശ്രീലങ്കയുടെ മുന്‍ പ്രധാനമന്ത്രി കൂടിയാണ് വിക്രമസിംഗെ.

പ്രധാനമന്ത്രി ഇന്ന് സ്ഥാനമേറ്റെടുക്കുമെന്ന് കഴിഞ്ഞ ദിവസം പ്രസിഡന്റ് വ്യക്തമാക്കിയിരുന്നു. ഇന്ന് ആറരയോടെയായിരുന്നു സത്യപ്രതിജ്ഞാച്ചടങ്ങുകള്‍ നടന്നത്.

സമവായ നീക്കത്തിന്റെ ഭാഗമായാണ് വിക്രമസിംഗെയെ പ്രധാനമന്ത്രിസ്ഥാനത്തെത്തുന്നത്. നേരത്തെ, അറബ് വസന്ത കാലത്തെ പ്രക്ഷോഭങ്ങള്‍ക്ക് സമാനമായ സാഹചര്യമാണ് ശ്രീലങ്കയില്‍ നടക്കുന്നതെന്ന് റെനില്‍ വിക്രമസിംഗെ പറഞ്ഞിരുന്നു.

പ്രക്ഷോഭകാരികളെ ഭയന്ന് ഒളിവില്‍ കഴിയുന്ന മുന്‍ പ്രധാനമന്ത്രി മഹിന്ദ രജപക്‌സെ രാജ്യം വിടുന്നത് ശ്രീലങ്കന്‍ സുപ്രിംകോടതി വിലക്കിയിട്ടുണ്ട്. രജപക്‌സെയെ കൂടാതെ മറ്റു 16 പേര്‍ക്കും രാജ്യം വിടാന്‍ വിലക്കുണ്ട്.