കുതിരാന്‍ ടണല്‍ ഉടന്‍ തുറക്കണമെന്ന് രമ്യ ഹരിദാസ് എംപി

തൃശൂര്‍: മണ്ണുത്തി-വടക്കുംഞ്ചേരി ദേശീയപാതയിലെ കുതിരാനില്‍ ഗതാഗത കുരുക്ക് ഉടന്‍ പരിഹരിക്കണമെന്ന് പാര്‍ലമെന്റില്‍ ശൂന്യവേളയില്‍ രമ്യ ഹരിദാസ്. ശബരിമല മണ്ഡലകാലമായതിനാല്‍ മറ്റ് സംസ്ഥാനങ്ങളില്‍ നിന്നുമുള്ള അയ്യപ്പഭക്തന്‍മാരുടെ ആയിരക്കണക്കിന് വാഹനങ്ങളാണ് ഇതുവഴി കടന്നു പോകുന്നത്.

പാലക്കാട് ജില്ലയില്‍ നിന്നുമുള്ള സാധാരണക്കാര്‍ തൃശൂര്‍ മെഡിക്കല്‍ കോളജിലേക്ക് പോകുന്ന പ്രധാന റോഡാണ്. യാത്രക്കാരെല്ലാം കുതിരാനില്‍ മണിക്കൂറുകളോളം ബ്ലോക്കില്‍പ്പെടുകയാണ്. ആയതിനാല്‍ 99% പണി പൂര്‍ത്തീകരിച്ച ടണല്‍ അടിയന്തിരമായി തുറന്നുകൊടുക്കുന്നതിനു വേണ്ട നടപടി സ്വീകരിക്കണം. കൂടാതെ വടക്കുംഞ്ചേരി മേല്‍പ്പാലം അടിയന്തിരമായി പൂര്‍ത്തീകരിക്കണമെന്നും രമ്യ ഹരിദാസ് ആവശ്യപ്പെട്ടു.