മുഖ്യമന്ത്രിയുടെ പ്രത്യയശാസ്ത്രത്തിന് അടിത്തറ പാകിയ പുസ്തകങ്ങള്‍ വിദ്യാര്‍ത്ഥികളില്‍ അടിച്ചേല്പ്പിക്കരുത്; പരിഹാസവുമായി രാഹുല്‍ മാങ്കൂട്ടത്തില്‍

തിരുവനന്തപുരം: മുഖ്യമന്ത്രിയുടെ പ്രത്യയശാസ്ത്രത്തിന് അടിത്തറ പാകിയ പുസ്തകങ്ങള്‍ വിദ്യാര്‍ത്ഥികളില്‍ അടിച്ചേല്പ്പിക്കരുതെന്ന് യൂത്ത് കോണ്‍ഗ്രസ് നേതാവ് രാഹുല്‍ മാങ്കൂട്ടത്തില്‍. മുഖ്യമന്ത്രിക്കുള്ള സംഘപരിവാര്‍ വിധേയത്വവും, 1977 ന്റെ കടപ്പാടിന്റെ ഹാങ്ങോവറിന്റെയും തെളിവാണിതെന്നും അദ്ദേഹം ഫേസ് ബുക്കില്‍ കുറിച്ചു.

ഫേസ് ബുക്ക് കുറിപ്പിന്റെ പൂര്‍ണ രൂപം

ഉത്തര്‍പ്രദേശിലെ കണ്ണൂര്‍ സര്‍വകലാശാലയുടെ സിലബസില്‍ ഗോള്‍വര്‍ക്കറിനെയും സവര്‍ക്കറിനെയും ഉള്‍പ്പെടുത്തുന്നത് വിദ്യാഭ്യാസ മേഘലയിലെ കാവിവത്കരണമാണ്.

മുഖ്യമന്ത്രിക്കുള്ള സംഘപരിവാര്‍ വിധേയത്വവും, 1977 ന്റെ കടപ്പാടിന്റെ ഹാങ്ങോവറിന്റെയും തെളിവാണിത്.

ഗോള്‍വര്‍ക്കറിന്റെയും, സവര്‍ക്കറിന്റെയും ആശയങ്ങളും, വര്‍ഗ്ഗീയ അജണ്ടകളെയും രാജ്യം തിരിച്ചറിഞ്ഞതാണ്. എന്നിട്ടും ചരിത്രത്തിലേക്ക് അവരെ ഒളിച്ചു കടത്തുവാനുള്ള ശ്രമം കാലങ്ങളായി സംഘപരിവാര്‍ നടത്തുന്നതിന്റെ ഉദാഹരണം തന്നെയാണ് യോഗിഭരണത്തിന്‍ കീഴിലെ കണ്ണൂര്‍ സര്‍വകലാശാലയിലെ ഈ ശ്രമവും.

മുഖ്യമന്ത്രിയുടെ പ്രത്യയശാസ്ത്രത്തിന് അടിത്തറ പാകിയ പുസ്തകങ്ങള്‍ ദയവ് ചെയ്ത് വിദ്യാര്‍ത്ഥികളില്‍ അടിച്ചേല്പ്പിക്കരുത്.