വീടുകളില്‍ സന്ദര്‍ശനം നടത്തുന്നതിനിടെ ആണ്‍കുട്ടിക്ക് നേരെ ലൈംഗികാതിക്രമം; പള്ളി വികാരിക്കെതിരെ പോക്‌സോ കേസ്

തൃശൂര്‍: കൊരട്ടിയില്‍ ആണ്‍കുട്ടിക്ക് നേരെ വൈദികന്റെ ലൈംഗികാതിക്രമം. കൊരട്ടി കോനൂര്‍ പള്ളി വികാരി ഫാ. ജോസഫ് കോടിയനെതിരെയാണ് പോലിസ് കേസെടുത്തത്. കഴിഞ്ഞ ദിവസമാണ് ജോസഫ് പ്രായപൂര്‍ത്തിയാകാത്ത കുട്ടിക്ക് നേരെ ലൈംഗികാതിക്രമം നടത്തിയത്. പെസഹാ ചടങ്ങുകളോട് അനുബന്ധിച്ച് വീടുകളില്‍ സന്ദര്‍ശനം നടത്തുന്നതിനിടെയായിരുന്നു അതിക്രമം.

ആരോഗ്യ പ്രശ്‌നങ്ങള്‍ നേരിട്ട കുട്ടി ബന്ധുക്കളോട് വിവരം അറിയിക്കുകയും തുടര്‍ന്ന് ബന്ധുക്കള്‍ പോലിസിലും സഭയിലും വിവരം അറിയിക്കുകയുമായിരുന്നു. സംഭവത്തില്‍ പോലിസ് കേസെടുത്തതിന് പിന്നാലെ വൈദികന്‍ ഒളിവില്‍ പോയതായി പോലിസ് പറഞ്ഞു. മൂന്ന് വര്‍ഷങ്ങള്‍ക്ക് മുന്‍പും സമാനമായ കേസില്‍ പ്രതിയായ ഫാ. ജോസഫ് കോടിയന്‍ ജയില്‍ ശിക്ഷ അനുഭവിച്ചിരുന്നു.