ഇസ്രായേല്‍ തടങ്കലില്‍ ഫലസ്തീനികള്‍ ലൈംഗിക പീഡനത്തിന് ഇരയാകുന്നു, റിപോര്‍ട്ട്

ഗസ: ഗസയിലെ യുദ്ധകാലത്ത് ഇസ്രായേല്‍ സൈന്യം തടവിലാക്കിയ ഫലസ്തീനികള്‍ ക്രൂരമായ ലൈംഗിക പീഡനങ്ങള്‍ക്ക് വിധേയമായെന്ന് റിപോര്‍ട്ട്. ഫലസ്തീന്‍ മനുഷ്യാവകാശ കേന്ദ്രം (പിസിഎച്ച്ആര്‍)ഇതുവരെ പുറത്തുവിട്ടതില്‍ വച്ച് ഏറ്റവും അസ്വസ്ഥത ഉളവാക്കുന്ന റിപോര്‍ട്ടുകളില്‍ ഒന്നാണിത്.

അടുത്തിടെ മോചിതരായ തടവുകാരില്‍ നിന്നുള്ള മൊഴികള്‍ ഉപയോഗിച്ചാണ് സംഘം റിപോര്‍ട്ട് തയ്യാറാക്കിയിരിക്കുന്നത്. ഇസ്രായേലി സൈനികരും ജയില്‍ അധികൃതരും പുരുഷന്മാര്‍ക്കും സ്ത്രീകള്‍ക്കും പ്രായപൂര്‍ത്തിയാകാത്തവര്‍ക്കും എതിരെ ബലാല്‍സംഗം, നിര്‍ബന്ധിത നഗ്‌നത, ലൈംഗികാതിക്രമം എന്നിവയുള്‍പ്പെടെയുള്ള സംഘടിത ലൈംഗിക അതിക്രമങ്ങള്‍ നടത്തിയതായി റിപോര്‍ട്ടില്‍ പറയുന്നു.

പിസിഎച്ച്ആര്‍ പ്രകാരം, 2023 അവസാനം മുതല്‍ ഗസയിലുടനീളമുള്ള വീടുകളില്‍ നിന്നോ ആശുപത്രികളില്‍ നിന്നോ ചെക്ക്പോസ്റ്റുകളില്‍ നിന്നോ അറസ്റ്റ് ചെയ്യപ്പെട്ടതും പിന്നീട് ഇസ്രായേലി തടങ്കലില്‍ നിന്ന് മോചിപ്പിക്കപ്പെട്ടതുമായ നിരവധി ഫലസ്തീനികളുമായുള്ള അഭിമുഖം ഞെട്ടിപ്പിക്കുന്നതാണ്. ഇസ്രായേല്‍ സൈന്യത്തിന്റെ ക്രൂരതകളുടെ ഇരകളാണ് അവരെല്ലാവരും.

'മനുഷ്യന്റെ അന്തസ്സിനെ തകര്‍ക്കാനും വ്യക്തിഗത ഐഡന്റിറ്റി ഇല്ലാതാക്കാനും' ഉദ്ദേശിച്ചുള്ള വീഡിയോ പകര്‍ത്തല്‍, വാക്കാലുള്ള ദുരുപയോഗം, മനപ്പൂര്‍വമായ അപമാനിക്കല്‍ എന്നിവയും ഉണ്ടായിരുന്നതായി സംഘടന പറഞ്ഞു. ഇതൊന്നും ഒറ്റപ്പെട്ട സംഭവങ്ങളല്ലെന്നും ഗസ മുനമ്പില്‍ ഇരുപത് ദശലക്ഷത്തിലധികം ഫലസ്തീനികള്‍ക്കെതിരെ നടന്നുകൊണ്ടിരിക്കുന്ന വംശഹത്യയുടെ ഭാഗമായി നടപ്പിലാക്കിയ സ്ഥിരവും ആസൂത്രിതവുമായ നയമാണെന്നും പിസിഎച്ച്ആര്‍ പറയുന്നു.

ഗസയിലെ തടവുകാരെ മനുഷ്യത്വരഹിതമായ സാഹചര്യങ്ങളില്‍ പാര്‍പ്പിച്ചിട്ടുണ്ടെന്ന് മനുഷ്യാവകാശ സംഘടനകള്‍ ആവര്‍ത്തിച്ച് ആരോപിക്കുന്ന, ഇസ്രായേലിലെ സ്‌ഡെ ടെയ്മാന്‍ സൈനിക ക്യാംപിലെ ലൈംഗിക പീഡനത്തെക്കുറിച്ചും റിപോര്‍ട്ട് ചൂണ്ടികാണിക്കുന്നു.

ഇരകളില്‍ വിവിധ പ്രായത്തിലുള്ള സാധാരണക്കാരും ഉള്‍പ്പെടുന്നു, പുരുഷന്മാരും സ്ത്രീകളും ഉള്‍പ്പെടെ, ഔപചാരിക കുറ്റങ്ങളോ വിചാരണകളോ ഇല്ലാതെ അവരെ കസ്റ്റഡിയിലെടുത്തതായി പിസിഎച്ച്ആര്‍ പറഞ്ഞു. അറസ്റ്റുകള്‍ പലപ്പോഴും ഏകപക്ഷീയമായിരുന്നുവെന്നും, നിലവിലുള്ള സംഘര്‍ഷത്തിനിടെ ഗസ നിവാസികളെ ലക്ഷ്യം വച്ചുള്ള കൂട്ടായ ശിക്ഷയുടെ വിശാലമായ നയത്തിന്റെ ഭാഗമാണെന്നും സംഘടന വ്യക്തമാക്കി.

അന്താരാഷ്ട്ര നിയമപ്രകാരം, തടവുകാരെ പീഡിപ്പിക്കുന്നതും മോശമായി പെരുമാറുന്നതും തടയാനും സ്വതന്ത്ര നിരീക്ഷണ സ്ഥാപനങ്ങളിലേക്ക് പ്രവേശനം അനുവദിക്കാനും ഇസ്രായേല്‍ ബാധ്യസ്ഥമാണ്. പീഡന ആരോപണങ്ങളില്‍ സുതാര്യമായ അന്വേഷണം ഉറപ്പാക്കാനും ഉത്തരവാദികളായവരെ പ്രോസിക്യൂട്ട് ചെയ്യാനും ഇസ്രായേലിനോട് യുഎന്‍ പീഡനത്തിനെതിരായ കമ്മിറ്റി ആവര്‍ത്തിച്ച് ആവശ്യപ്പെട്ടിട്ടുണ്ട്.

ഹ്യൂമന്‍ റൈറ്റ്‌സ് വാച്ച്, ആംനസ്റ്റി ഇന്റര്‍നാഷണല്‍ എന്നിവയുള്‍പ്പെടെയുള്ള മനുഷ്യാവകാശ സംഘടനകള്‍, ഇസ്രായേല്‍ കസ്റ്റഡിയിലുള്ള പലസ്തീനികളെ വ്യവസ്ഥാപിതമായി മോശമായി പെരുമാറുന്നതായി വിശേഷിപ്പിക്കുന്നത് വളരെക്കാലമായി രേഖപ്പെടുത്തിയിട്ടുണ്ട്. അന്താരാഷ്ട്ര ക്രിമിനല്‍ കോടതിയില്‍ (ഐസിസി) സമര്‍പ്പിക്കുന്നതിനായി സമാഹരിക്കപ്പെടുന്ന തെളിവുകളുടെ വര്‍ധിുവരുന്ന ശേഖരത്തിലേക്ക് പിസിഎച്ച്ആറിന്റെ പുതിയ കണ്ടെത്തലുകള്‍ ഉള്‍പ്പെടുത്തും.