മഹാരാഷ്ട്രയില്‍ മറാത്തി നിര്‍ബന്ധിതഭാഷ; മറ്റൊരു ഭാഷയും അടിച്ചേല്‍പ്പിക്കില്ലെന്ന് ദേവേന്ദ്ര ഫഡ്നാവിസ്

മുംബൈ: മഹാരാഷ്ട്രയില്‍ മറാത്തി നിര്‍ബന്ധിതഭാഷയായിരിക്കുമെന്നും മറ്റൊരു ഭാഷയും അടിച്ചേല്‍പ്പിക്കില്ലെന്നും മുഖ്യമന്ത്രി ദേവേന്ദ്ര ഫഡ്നാവിസ്. സത്താറയില്‍ നടന്ന 99-ാമത് അഖില ഭാരതീയ മറാത്തി സാഹിത്യ സമ്മേളനത്തില്‍ പങ്കെടുത്ത് സംസാരിക്കുകയായിരുന്നു അദ്ദേഹം. ഫ്രഞ്ച്, സ്പാനിഷ് തുടങ്ങിയ വിദേശ ഭാഷകള്‍ക്ക് ചുവപ്പ് പരവതാനി വിരിക്കുമ്പോള്‍ മറ്റ് ഇന്ത്യന്‍ ഭാഷകളെ എതിര്‍ക്കുന്നത് തെറ്റാണെന്നും അദ്ദേഹം പറഞ്ഞു.

കഴിഞ്ഞ വര്‍ഷം, മഹാരാഷ്ട്രയിലെ സ്‌കൂളുകളില്‍ ഒന്നാം ക്ലാസ് മുതല്‍ ഹിന്ദി മൂന്നാം ഭാഷയായി അവതരിപ്പിക്കാനുള്ള തീരുമാനം ബിജെപി നേതൃത്വത്തിലുള്ള സര്‍ക്കാര്‍ പിന്‍വലിക്കുകയും, ഈ വിഷയം പരിശോധിക്കാന്‍ ഒരു കമ്മിറ്റി രൂപീകരിക്കുകയും ചെയ്തു.ഭാഷാ നിര്‍ബന്ധിതമാക്കല്‍ എന്ന വിഷയം വ്യാപകമായി ചര്‍ച്ച ചെയ്യപ്പെടുന്നുണ്ടെന്ന് ഫഡ്നാവിസ് തന്റെ പ്രസംഗത്തില്‍ ചൂണ്ടിക്കാട്ടി.

'മുഖ്യമന്ത്രി എന്ന നിലയില്‍, മഹാരാഷ്ട്രയില്‍ മറാത്തി മാത്രമേ നിര്‍ബന്ധമുള്ളൂ എന്ന് ഞാന്‍ വ്യക്തമായി പറയാന്‍ ആഗ്രഹിക്കുന്നു. മറ്റൊരു ഭാഷയും നിര്‍ബന്ധമല്ല. എന്നിരുന്നാലും, ത്രിഭാഷാ ഫോര്‍മുലയെക്കുറിച്ച് വ്യത്യസ്ത അഭിപ്രായങ്ങളുണ്ടായിരുന്നു. വിദ്യാര്‍ഥികള്‍ക്ക് ഇഷ്ടമുള്ള ഏത് ഇന്ത്യന്‍ ഭാഷയും പഠിക്കാനുള്ള സ്വാതന്ത്ര്യമുണ്ട്. മൂന്നാം ഭാഷ ഏത് നിലവാരത്തില്‍ നിന്നാണ് അവതരിപ്പിക്കേണ്ടത് എന്നതായിരുന്നു ഒരേയൊരു ചോദ്യം,' അദ്ദേഹം പറഞ്ഞു.

'ഇംഗ്ലീഷ്, ഫ്രഞ്ച്, സ്പാനിഷ് തുടങ്ങിയ ഭാഷകള്‍ക്ക് ഞങ്ങള്‍ ചുവപ്പ് പരവതാനി വിരിച്ചിരിക്കുന്നുവെന്ന് ഖേദപൂര്‍വ്വം ചൂണ്ടിക്കാണിക്കാന്‍ ഞാന്‍ ആഗ്രഹിക്കുന്നു.... ഇവ അന്താരാഷ്ട്ര ഭാഷകളായതിനാല്‍ ഈ ഭാഷകളോടുള്ള ഞങ്ങളുടെ നിലപാട് സ്വാഗതാര്‍ഹമാണ്. എന്നാല്‍ ഇന്ത്യന്‍ ഭാഷകളെ എതിര്‍ക്കുമ്പോള്‍ അന്താരാഷ്ട്ര ഭാഷകളെ സ്വാഗതം ചെയ്യുന്നത് അനുചിതമാണ്. നമ്മുടെ ഇന്ത്യന്‍ ഭാഷകള്‍ക്കും അതേ ബഹുമാനം നല്‍കണമെന്ന് ഞാന്‍ വിശ്വസിക്കുന്നു, അതാണ് ഞങ്ങളുടെ നിലപാട്,' അദ്ദേഹം പറഞ്ഞു.അടിയന്തരാവസ്ഥക്കാലത്ത് സത്താറയില്‍ പ്രമുഖ എഴുത്തുകാരിയും പണ്ഡിതയുമായ ദുര്‍ഗാ ഭഗവത് അധ്യക്ഷത വഹിച്ച മറാത്തി സാഹിത്യ സമ്മേളനത്തെക്കുറിച്ചും ഫഡ്നാവിസ് പരാമര്‍ശിച്ചു.