മാട്രിമോണി സൈറ്റിലൂടെ അധ്യാപികയെ വഞ്ചിച്ച് 2.27 കോടി രൂപ തട്ടി യുവാവ്

ബെംഗളൂരു: മാട്രിമോണി സൈറ്റില്‍ പരിചയപ്പെട്ട യുവാവ് അധ്യാപികയെ വഞ്ചിച്ച് പണം തട്ടിയതായി പരാതി. അധ്യാപികയുടെ കൈയ്യില്‍ നിന്നും 2.27 കോടി രൂപ പല കാരണങ്ങള്‍ പറഞ്ഞ് യുവാവ് തട്ടിയെടുത്തുവെന്നാണ് പരാതി. 59 വയസ്സുള്ള അധ്യാപികയ്ക്ക് ഒരു മകന്‍ ഉണ്ടെങ്കിലും ഒറ്റയ്ക്കായിരുന്നു താമസം. ഒറ്റയ്ക്കായതിനാല്‍ ഒരു ജീവിത പങ്കാളിയെ വേണമെന്ന് ആഗ്രഹിച്ചാണ് അധ്യാപിക മാട്രിമോണി സൈറ്റില്‍ രജിസ്റ്റര്‍ ചെയ്തത്.

യുഎസ് പൗരനായ അഹന്‍ കുമാറിനെ മാട്രിമോണിയിലൂടെയാണ് പരിചയപ്പെട്ടത്. ഇയാള്‍ 2019 ഡിസംബര്‍ മുതല്‍ അറ്റ്‌ലാന്റയില്‍ താമസിക്കുകയാണ്. തുര്‍ക്കിയില്‍ ഒരു കമ്പനിയുടെ ഡ്രില്ലിംഗ് എഞ്ചിനീയറാണ് എന്നാണ് അധ്യാപികയോട് പറഞ്ഞത്.

2020 ജനുവരിയില്‍ ഭക്ഷണത്തിന് പണം തികയുന്നില്ലെന്ന് പറഞ്ഞാണ് ഇയാള്‍ അധ്യാപികയോട് ആദ്യമായി പണം ആവശ്യപ്പെട്ടത്. അധ്യാപിക പണം അയച്ചു നല്‍കുകയായിരുന്നു. പിന്നീട് മറ്റു പല കാരണങ്ങള്‍ ചൂണ്ടിക്കാട്ടി അയാള്‍ കൂടുതല്‍ പണം വാങ്ങിക്കല്‍ തുടരുകയായിരുന്നു. ഏകദേശം 2.27 കോടി രൂപ ഇത്തരത്തില്‍ അധ്യാപിക അയാള്‍ക്ക് കൈമാറിയതായി എഫ്‌ഐആറില്‍ പറയുന്നു. പണം തിരികെ ചോദിച്ചെങ്കിലും തരാന്‍ അയാള്‍ തയാറായില്ല. കഴിഞ്ഞ ദിവസം വീണ്ടും 3.5 ലക്ഷം രൂപ ആവശ്യപ്പെട്ടതിനെ തുടര്‍ന്നാണ് അധ്യാപിക ഇയാല്‍ക്കെതിരേ പോലിസില്‍ പരാതി നല്‍കിയത്. സംഭവത്തില്‍ പോലിസ് അന്വേഷണം ആരംഭിച്ചു.