കൊച്ചി മേയര്‍ തിരഞ്ഞെടുപ്പ്: ഡല്‍ഹിയിലെത്തി എഐസിസിക്ക് പരാതി നല്‍കി ദീപ്തി മേരി വര്‍ഗീസ്

ന്യൂഡല്‍ഹി: കൊച്ചി മേയര്‍ സ്ഥാനത്തേക്ക് തന്നെ തഴഞ്ഞതില്‍ ഹൈക്കമാന്‍ഡിന് പരാതിയുമായി ദീപ്തി മേരി വര്‍ഗീസ്. കെപിസിസി മാര്‍ഗനിര്‍ദേശം പാലിക്കാതെ മേയര്‍ തിരഞ്ഞെടുപ്പ് നടത്തി എന്നാണ് പരാതിയില്‍ ചൂണ്ടിക്കാട്ടിയിരിക്കുന്നത്. ഡല്‍ഹിയില്‍ നേതാക്കളുമായി ദീപ്തി മേരി വര്‍ഗീസ് കൂടിക്കാഴ്ച നടത്തി. സംസ്ഥാന കോണ്‍ഗ്രസില്‍ പരാതി സമര്‍പ്പിച്ചിട്ടും അനുകൂല നടപടി ഉണ്ടാകാത്ത സാഹചര്യത്തിലാണ് പരാതിയുമായി ദീപ്തി ഡല്‍ഹിയിലെത്തിയത്. കൊച്ചിയെ നയിക്കാന്‍ ഒരാള്‍ വേണമെന്ന് പാര്‍ട്ടി നേതൃത്വം ആവശ്യപ്പെട്ടിട്ടാണ് താന്‍ മല്‍സരിച്ചതെന്നും എന്നിട്ടും മേയര്‍ സ്ഥാനത്തേക്ക് തഴഞ്ഞെന്നുമായിരുന്നു ദീപ്തിയുടെ പരാതി. തന്നെ തഴഞ്ഞതിനായി പാര്‍ട്ടിക്ക് അകത്തും പുറത്തും പറഞ്ഞ കാരണങ്ങള്‍ തന്നെ അപമാനിക്കുന്നതാണെന്നും ദീപ്തി ചൂണ്ടിക്കാട്ടിയിരുന്നു.

മേയര്‍ തിരഞ്ഞെടുപ്പുമായി ബന്ധപ്പെട്ട് കെപിസിസിക്ക് കൃത്യമായ മാനദണ്ഡങ്ങള്‍ ഉണ്ടായിരുന്നു. എന്നാല്‍ ഇതൊന്നും പാലിക്കാതെയാണ് ഡിസിസി പ്രസിഡന്റ് മുഹമ്മദ് ഷിയാസിന്റെ നേതൃത്വത്തില്‍ മേയറെ നിശ്ചയിച്ചതെന്നും അതിന് കൃത്യമായ അജണ്ടയുണ്ടായിരുന്നുവെന്നുമാണ് ദീപ്തിയുടെ ആരോപണം. ഇന്നലെ വൈകീട്ടോടെയാണ് ദീപ്തി ഡല്‍ഹിയിലെത്തിയത്. രാവിലെ ദീപ്തി മുതിര്‍ന്ന നേതാക്കളുമായി കൂടിക്കാഴ്ച നടത്തുകയും തന്റെ പരാതികള്‍ അറിയിക്കുകയും ചെയ്തു. വി കെ മിനിമോളെയാണ് നിലവില്‍ കൊച്ചി മേയറായി തിരഞ്ഞെടുത്തിരിക്കുന്നത്.