മഴ കനക്കുന്നു; ജാഗ്രത പാലിക്കണമെന്ന് ദുരന്തനിവാരണ വകുപ്പ്

ന്യൂഡല്‍ഹി: രാജ്യത്ത് മഴ കനക്കുന്നു. ഉത്തരാഖണ്ഡ്, ഹിമാചല്‍ പ്രദേശ് എന്നിവയുള്‍പ്പെടെയുള്ള മഴ നാശം വിതച്ചിട്ടുണ്ട്, അതേസമയം സമതലങ്ങളില്‍ വെള്ളപ്പൊക്ക സമാനമായ സാഹചര്യങ്ങള്‍ ഉയര്‍ന്നുവന്നിട്ടുണ്ട്. ജമ്മു കശ്മീര്‍, ഉത്തരാഖണ്ഡ്, തെലങ്കാന എന്നിവിടങ്ങളില്‍ മഴയ്ക്ക് സാധ്യതയുള്ളതിനാല്‍ കാലാവസ്ഥാ വകുപ്പ് റെഡ് അലേര്‍ട്ട് പ്രഖ്യാപിച്ചു. ഈ സംസ്ഥാനങ്ങളില്‍ ഇടിമിന്നലോടുകൂടി ശക്തമായതോ വളരെ ശക്തമായതോ ആയ മഴയ്ക്കും സാധ്യതയുണ്ട്. ജനങ്ങള്‍ ജാഗ്രത പാലിക്കണമെന്ന് ദുരന്തനിവാരണ വകുപ്പ് മുന്നറിയിപ്പ് നല്‍കി.

യുപിയിലും ബീഹാറിലും കനത്ത മഴയെത്തുടര്‍ന്ന് ഗംഗയും കോസിയും ഉള്‍പ്പെടെ സംസ്ഥാനത്തെ പ്രധാന നദികളെല്ലാം കരകവിഞ്ഞൊഴുകുകയാണ്. ബീഹാറിലെ 12 ജില്ലകളിലായി ഏകദേശം 17 ലക്ഷം ആളുകളെ വെള്ളപ്പൊക്കം ബാധിച്ചിട്ടുണ്ട്. യുപിയിലെ 55 ജില്ലകളില്‍ കാലാവസ്ഥ വകുപ്പിന്റെ മഴ അലേര്‍ട്ട് ഉണ്ട്. ഇതില്‍ സഹാറന്‍പൂര്‍ ഉള്‍പ്പെടെ വടക്ക് യുപിയിലെയും കിഴക്കന്‍ യുപിയിലെയും ജില്ലകളും ഉള്‍പ്പെടുന്നു. അതേസമയം, ബീഹാറിലെ 24 ജില്ലകളില്‍ കനത്ത മഴയ്ക്ക് സാധ്യതയുണ്ട്

ഉത്തരാഖണ്ഡില്‍ രക്ഷാപ്രവര്‍ത്തനങ്ങള്‍ ഇപ്പോഴും തുടരുകയാണ്. ഡെറാഡൂണ്‍, തെഹ്രി, പൗരി, ഹരിദ്വാര്‍, ഉധം സിംഗ് നഗര്‍, ചമ്പാവത്, നൈനിറ്റാള്‍, ബാഗേശ്വര്‍ എന്നിവിടങ്ങളില്‍ ഇന്ന് കനത്തതോ അതിശക്തമായതോ ആയ മഴയ്ക്ക് സാധ്യതയുണ്ടെന്ന് കാലാവസ്ഥ വകുപ്പ് അറിയിച്ചു. അതേസമയം, ഉത്തരകാശിയിലും പിത്തോറഗഡിലും മഴയ്ക്കുള്ള ഓറഞ്ച് അലേര്‍ട്ട് പുറപ്പെടുവിച്ചിട്ടുണ്ട്.

ഹിമാചല്‍ പ്രദേശില്‍ മഴയിലും മണ്ണിടിച്ചിലിലും ഇതുവരെ 240 പേര്‍ മരിച്ചു. ഹിമാചലിലെ 5 ജില്ലകളായ കുളു, ഉന, ഹാമിര്‍പൂര്‍, ചമ്പ, സോളന്‍ എന്നിവിടങ്ങളില്‍ ഓഗസ്റ്റ് 15 വരെ കനത്ത മഴ പെയ്യുമെന്ന് കാലാവസ്ഥാ വകുപ്പ് പ്രവചിച്ചു. കിന്നൗര്‍, ലഹൗള്‍, സ്പിതി എന്നിവിടങ്ങളില്‍ വെള്ളപ്പൊക്കത്തിനും സാധ്യതയുണ്ട്.ഡല്‍ഹി എന്‍സിആറില്‍ മഴയ്ക്ക് സാധ്യതയുള്ളതിനാല്‍ കാലാവസ്ഥാ വകുപ്പ് ഓറഞ്ച് അലേര്‍ട്ടും പുറപ്പെടുവിച്ചിട്ടുണ്ട്. ഇതിനുപുറമെ, മധ്യപ്രദേശ്, ജാര്‍ഖണ്ഡ്, ഛത്തീസ്ഗഢ്, ഒഡീഷ, മഹാരാഷ്ട്ര, ആന്ധ്രാപ്രദേശ് എന്നിവിടങ്ങളിലെ ചില പ്രദേശങ്ങളില്‍ മഴയ്ക്ക് സാധ്യതയുള്ളതിനാല്‍ ഓറഞ്ച് അലേര്‍ട്ട് പുറപ്പെടുവിച്ചിട്ടുണ്ട്. പടിഞ്ഞാറന്‍ രാജസ്ഥാന്‍, ഗുജറാത്ത്, ഗോവ എന്നിവിടങ്ങളിലെ ചില ഭാഗങ്ങള്‍ ഒഴികെയുള്ള എല്ലാ സംസ്ഥാനങ്ങളിലും മഴയ്ക്ക് സാധ്യതയുള്ളതിനാല്‍ മഞ്ഞ അലേര്‍ട്ട് പുറപ്പെടുവിച്ചിട്ടുണ്ട്.