പെരിന്തല്‍മണ്ണയില്‍ കഞ്ചാവ് മൊത്തക്കച്ചവടക്കാരെ പിടികൂടി

പെരിന്തല്‍മണ്ണ: കഞ്ചാവ് മൊത്തക്കച്ചവടക്കാരെ പിടികൂടി. തമിഴ്‌നാട്ടില്‍ നിന്നും മൊത്തമായി കഞ്ചാവെത്തിച്ചു പെരിന്തല്‍മണ്ണയില്‍ വിതരണം ചെയ്യുന്നവരെ പെരിന്തല്‍മണ്ണ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഇ പി സിബിയുടെ നേതൃത്വത്തില്‍ പിടികൂടി.

പാലക്കാട് കോങ്ങാട് സ്വദേശിയായ പൂളക്കല്‍ വിഷ്ണു (27), മണ്ണാര്‍ക്കാട് പൊറ്റശ്ശേരി സ്വദേശിയായ പഴയ പീടിക മുഹമ്മദ് മുസ്തഫ (33) എന്നിവരാണ് അറസ്റ്റിലായത്. മലപ്പുറം എക്‌സൈസ് ഇന്റലിജന്‍സ് പ്രിവന്റീവ് ഓഫിസര്‍ ഡി ഫ്രാന്‍സിസ് നല്‍കിയ രഹസ്യവിവരത്തിന്റെ അടിസ്ഥാനത്തിലാണ് സംഘം പിടിയിലായത്.

പെരിന്തല്‍മണ്ണ ഇഎംഎസ് ഹോസ്പിറ്റലിനു സമീപം നടത്തിയ വാഹന പരിശോധനക്കിടെ കെഎല്‍ 52 എ 6486 നമ്പര്‍ ബൈക്കിലെത്തിയ ഇവരില്‍നിന്ന് ഒരു കിലോ 550 ഗ്രാം കഞ്ചാവാണ് പിടിച്ചെടുത്തത്.

കഞ്ചാവും, കഞ്ചാവ് കടത്താന്‍ ഉപയോഗിച്ച ബൈക്കും, മൊബൈല്‍ ഫോണും, 3000 രൂപയും കസ്റ്റഡിയില്‍ എടുത്തു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.

പരിശോധനയില്‍ പ്രിവന്റീവ് ഓഫിസര്‍മാരായ ഡി ഫ്രാന്‍സിസ്, വി കുഞ്ഞുമുഹമ്മദ്, ഡി ഷിബു, സിവില്‍ എക്‌സൈസ് ഓഫിസര്‍മാരായ പി എച്ച് പ്രത്യുഷ്, എസ് സുനില്‍കുമാര്‍, വി ടി കമ്മുക്കുട്ടി, എക്‌സൈസ് െ്രെഡവര്‍ കെ പുഷ്പരാജ് പങ്കെടുത്തു.