യൂറോപ്പാ ലീഗ്; ആഴ്‌സണലും അയാക്‌സും പുറത്ത്; വോള്‍വ്‌സും യുനൈറ്റഡും പ്രീ ക്വാര്‍ട്ടറില്‍

ലണ്ടന്‍: യൂറോപ്പാ ലീഗില്‍ ഇന്ന് നടന്ന മല്‍സരങ്ങളില്‍ വമ്പന്‍മാര്‍ക്ക് കാലിടറി. ഇംഗ്ലിഷ് ക്ലബ്ബ് ആഴ്‌സണല്‍, ഡച്ച് ക്ലബ്ബ് അയാക്‌സ്, പോര്‍ച്ചുഗ്രീസ് ക്ലബ്ബുകളായ സ്‌പോര്‍ട്ടിങ് ലിസ്ബണ്‍, എഫ് സി പോര്‍ട്ടോ, സ്‌കോട്ടിഷ് പ്രമുഖര്‍ സെല്‍റ്റിക്ക് എന്നിവര്‍ പ്രീക്വാര്‍ട്ടര്‍ കാണാതെ പുറത്തായി. ഗ്രീക്ക് ക്ലബ്ബ് ഒളിമ്പിയാക്കോസിനോട് 2-1ന് തോറ്റാണ് ആഴ്‌സണല്‍ പുറത്തായത്. 2-2 അഗ്രിഗേറ്റിലാണ് ഒളിമ്പിയാക്കോസിന്റെ ജയം. ആദ്യപാദത്തിലെ എവേ ഗോളാണ് ഒളിംമ്പിയാക്കോസിന് തുണയായത് . ഗെറ്റാഫെയോട് 2-1ന് തോറ്റാണ് അയാകസ് പുറത്തായത്. ഇരുപാദങ്ങളിലുമായി 2-3ന്റെ ലീഡുമായാണ് ഗെറ്റാഫെ പ്രീക്വാര്‍ട്ടറിലേക്ക് കയറിയത്.

എസ്പാനിയോള്‍ രണ്ടാം പാദത്തില്‍ 3-2ന് വോല്‍വ്‌സിനെ തോല്‍പ്പിച്ചെങ്കിലും ആദ്യപാദത്തിലെ നാല് ഗോള്‍ ലീഡാണ് വോള്‍വ്‌സിന് തുണയായത്. ക്ലബ്ബ് ബ്രൂഗ്‌സിനെ 5-0ത്തിന് തോല്‍പ്പിച്ചാണ് യുനൈറ്റഡ് പ്രീക്വാര്‍ട്ടറിലേക്ക് പ്രവേശിച്ചത്. ഇരുപാദങ്ങളിലുമായി 6-1ന്റെ ജയമാണ് യുനൈറ്റഡ് നേടിയത്. ഇന്റര്‍ മിലാന്‍ ലുഡോഗോര്‍റ്റസിയെ 2-1നാണ് തോല്‍പ്പിച്ചത്. ആദ്യപാദത്തില്‍ 2-0ത്തിന്റെ ജയം ഇന്റര്‍ നേടിയിരുന്നു.

സ്‌പോര്‍ട്ടിങ് ലിസ്ബണെ 4-1നാണ് ഇസ്താംപൂള്‍ ബാസകെഹിര്‍ തോല്‍പ്പിച്ചത്. ആദ്യപാദത്തില്‍ 3-1ന് തോറ്റ തുര്‍ക്കി ടീം രണ്ടാം പാദത്തില്‍ 4-1ന് ജയം കാണുകയായിരുന്നു. എഫ് സി പോര്‍ട്ടോയെ ബയേണ്‍ ലെവര്‍കൂസന്‍ ഇരുപാദങ്ങളിലുമായി 5-2ന് തോല്‍പ്പിച്ചാണ് അവസാന 16 ലേക്ക് ഇടം നേടിയത്.