സ്‌കൂള്‍ സമയമാറ്റം വിശദമായ പഠനത്തിന് ശേഷമെന്ന് വിദഗ്ധ സമിതി

തിരുവനന്തപുരം: പുതിയ സ്‌കൂള്‍ സമയമാറ്റം വിശദമായ പഠനത്തിന് ശേഷം മതിയെന്ന് വിദഗ്ദ സമിതി സര്‍ക്കാരിന് റിപോര്‍ട്ട് നല്‍കി. 2025 ഫെബ്രുവരി മുതല്‍ ഏപ്രില്‍ പത്ത് വരെ വിവിധ ജില്ലകളില്‍ വിദ്യാര്‍ഥികളോടും അധ്യാപകരോടും രക്ഷിതാക്കളോടും അഭിപ്രായം ചോദിച്ചാണ് വിദഗ്ദ സമിതി റിപോര്‍ട്ട് തയ്യാറാക്കിയത്.

കാസര്‍കോട്, വയനാട്, മലപ്പുറം പാലക്കാട്, ആലപ്പുഴ, തിരുവനന്തപുരം എന്നീ ജില്ലകളില്‍ നിന്നാണ് അഭിപ്രായം തേടിയത്. 819 അധ്യാപകര്‍, 520 വിദ്യാര്‍ത്ഥികള്‍, 156 രക്ഷിതാക്കള്‍, 4,490 പൊതുജനങ്ങള്‍ എന്നിവരുടെ അഭിപ്രായമാണ് പരിശോധിച്ചത്.

ശനിയാഴ്ച ഉള്‍പ്പെടെ ക്ലാസ് നടത്താനുള്ള തീരുമാനത്തെ ഭൂരിഭാഗം പേരും എതിര്‍ത്തു. എന്നാല്‍ സ്‌കൂള്‍ ദിവസങ്ങള്‍ പരമാവധി സമയം ഉപയോഗിക്കണമെന്ന് 50.7% രക്ഷിതാക്കളും അഭിപ്രായപ്പെട്ടു. 41.1% രക്ഷിതാക്കള്‍ സിലബസ് കുറയ്ക്കാനും അനാവശ്യ അവധികള്‍ കുറയ്ക്കാനും നിര്‍ദ്ദേശിച്ചു. പഠന ദിവസങ്ങള്‍ കൂട്ടുന്നതിനെ 87.2% പേരും എതിര്‍ത്തു.