ബൈക്ക് നിയന്ത്രണംവിട്ട് മറിഞ്ഞ് കോളജ് വിദ്യാര്‍ഥി മരിച്ചു

കുട്ടിക്കാനം: ബൈക്ക് നിയന്ത്രണം വിട്ട് മറിഞ്ഞുണ്ടായ അപകടത്തില്‍ കോളജ് വിദ്യാര്‍ഥി മരിച്ചു. ഒപ്പമുണ്ടായിരുന്ന സഹപാഠി പരിക്കേറ്റ് ചികിത്സയിലാണ്. അണക്കര പ്ലാമൂട്ടില്‍ വീട്ടില്‍ ഡോണ്‍ സാജന്‍ (19) ആണ് മരിച്ചത്. കുട്ടിക്കാനം മരിയന്‍ കോളജിലെ ബിഎസ്‌സി ഫിസിക്‌സ് ഒന്നാംവര്‍ഷ വിദ്യാര്‍ഥിയാണ്. കോളജില്‍ നടക്കുന്ന എക്‌സിബിഷനു വേണ്ട സാമഗ്രികള്‍ വാങ്ങാനായി പോയ വഴിയിലായിരുന്നു സംഭവം.

കൊട്ടാരക്കര ദിണ്ടിഗല്‍ ദേശീയപാതയിലെ ഐഎച്ച്ആര്‍ഡി കോളജിന് സമീപത്തെ വളവിലാണ് ചൊവ്വാഴ്ച രാവിലെ പതിനൊന്നു മണിയോടെ അപകടമുണ്ടായത്. റോഡില്‍ മറിഞ്ഞ ബൈക്ക് മീറ്ററുകളോളം തെന്നിനീങ്ങി നിന്നു. അപകട സ്ഥലത്ത് തന്നെ ഡോണ്‍ മരിച്ചു. ബൈക്കില്‍ ഒപ്പമുണ്ടായിരുന്ന ഏലപ്പാറ നാലാംമൈല്‍ സ്വദേശി അന്‍സല്‍ (18) കോട്ടയം സ്വകാര്യ ആശുപത്രിയില്‍ ചികില്‍സയിലാണ്. ഡോണിന്റെ മൃതദേഹം പോസ്റ്റ്‌മോര്‍ട്ടത്തിനായി ഇടുക്കി മെഡിക്കല്‍ കോളജിലേക്ക് മാറ്റി.