നിലമ്പൂരില്‍ പനി ബാധിച്ച് ചികില്‍സയിലായിരുന്ന ആദിവാസി യുവതി മരിച്ചു

നിലമ്പൂര്‍: നിലമ്പൂരില്‍ പനി ബാധിച്ച് ചികില്‍സയിലായിരുന്ന ആദിവാസി യുവതി മരിച്ചു. ചോലനായ്ക്കര്‍ വിഭാഗത്തിലെ കരുളായി ഉള്‍വനത്തിലെ സുസ്മിതയാണ്(20)മരിച്ചത്. കരുളായിയില്‍ നിന്ന് 25 കിലോമീറ്റര്‍ അകലെ കുപ്പമലയില്‍ പാറ അളയിലാണ് കുടുംബം കഴിയുന്നത്. മൂന്നാഴ്ച മുന്‍പാണ് സുസ്മിതയ്ക്ക് പനി തുടങ്ങിയത്. എന്നാല്‍ വാഹനങ്ങളുടെ ലഭ്യത കുറവായതിനാല്‍ ആശുപത്രിയില്‍ പോകാന്‍ ഇവര്‍ക്ക് സാധിച്ചിരുന്നില്ല. ഈ ഭാഗത്തേക്ക് വാഹനം എത്തിപ്പെടാനുള്ള സൗകര്യം കുറവായതിനാല്‍ കുട്ടയില്‍ ചുമന്നാണ് യുവതിയെ ബന്ധുക്കള്‍ ജീപ്പ് വന്നിരുന്ന സ്ഥലത്തേക്കെത്തിച്ചത്. പിന്നീട് ട്രൈബല്‍ എക്സ്റ്റന്‍ഷന്‍ ഓഫിസര്‍ ഇടപെട്ടാണ് ഇവരെ വെള്ളിയാഴ്ച്ച ജില്ലാ ആശുപത്രിയില്‍ പ്രവേശിപ്പിച്ചത്. ഇന്നലെ രക്തസമ്മര്‍ദ്ദവും ശരീരത്തില്‍ ഓക്‌സിജന്റ അളവും കുറഞ്ഞതോടെ ആരോഗ്യനില മോശമായി. തുടര്‍ന്ന് തീവ്രപരിചരണ വിഭാഗത്തിലേക്ക് മാറ്റിയെങ്കിലും ജീവന്‍ രക്ഷിക്കാനായില്ല.