ഇന്ത്യയില്‍ വീണ്ടും കൊറോണ: സ്ഥിരീകരിച്ചത് ഡല്‍ഹിയിലും തെലങ്കാനയിലും

ന്യൂഡല്‍ഹി: ഇന്ത്യയില്‍ വീണ്ടും രണ്ട് കൊറോണ കേസുകള്‍ കൂടി സ്ഥിരീകരിച്ചു. ഡല്‍ഹിയിലും തെലങ്കാനയിലുമാണ് കൊറോണ സ്ഥിരീകരിച്ചത്. ഇറ്റലിയില്‍ നിന്ന് ഡല്‍ഹിയിലെത്തിയ ഒരാള്‍ക്കും ദുബായില്‍ നിന്ന് തെലങ്കാനയിലെത്തിയ ഒരാള്‍ക്കുമാണ് വൈറസ് ബാധ സ്ഥിരീകരിച്ചത്. ഇരുവരും നിരീക്ഷണത്തിലാണെന്നും ഇവരുടെ ആരോഗ്യനില തൃപ്തികരമാണെന്നും കേന്ദ്ര ആരോഗ്യ മന്ത്രാലയം അറിയിച്ചു.

നേരത്തെ കേരളത്തില്‍ കൊറോണ വൈറസ് ബാധ സ്ഥിരീകരിച്ച മൂന്ന് പേരെയും ഡിസ്ചാര്‍ജ് ചെയ്തത്തിന് പിന്നാലെയാണ് ഇന്ത്യയില്‍ വീണ്ടും കൊറോണ റിപ്പോര്‍ട്ട് ചെയ്യുന്നത്. നിലവില്‍ ഇന്ത്യയില്‍ വിദേശത്ത് നിന്ന് മടങ്ങിയെത്തിയവരുള്‍പ്പെടെ നിരവധിപേര്‍ നിരീക്ഷത്തിലുണ്ട്. അവസാനമായി കൊവിഡ് 19 ബാധിച്ച് ചികിത്സയിലുണ്ടായിരുന്ന രോഗിയും ആശുപത്രി വിട്ടിരുന്നു. എങ്കിലും ഇപ്പോള്‍ കേരളത്തെ കൊവിഡ് 19 വിമുക്തമായി പ്രഖ്യാപിക്കാറായിട്ടില്ലെന്ന് തന്നെയാണ് ആരോഗ്യമന്ത്രി വ്യക്തമാക്കുന്നത്.

അതിനിടെ, ഇറാനില്‍ കുടുങ്ങിക്കിടക്കുന്ന മത്സ്യത്തൊഴിലാളികളെ നാട്ടില്‍ തിരിച്ചെത്തിക്കാനുള്ള ശ്രമത്തിലാണ് കേന്ദ്രസര്‍ക്കാര്‍ . മത്സ്യത്തൊഴിലാളികള്‍ക്ക് കൊറോണ വൈറസ് ബാധിച്ചിട്ടുണ്ടോ എന്ന് പരിശോധിക്കാന്‍ പൂനെ വൈറോളജി ഇന്‍സ്റ്റിറ്റിയൂട്ടിലെ വിദഗ്ധരെ ഇറാനിലേക്ക് പറഞ്ഞുവിടും. ഇവരില്‍ രോഗമില്ലെന്ന് സ്ഥിരികരിക്കുന്നവരെ ഇന്ത്യയില്‍ തിരിച്ചെത്തിക്കുമെന്നും കേന്ദ്രം അറിയിച്ചു.

അതേസമയം ഗള്‍ഫ് രാജ്യങ്ങളിലേക്കുള്ള നെടു നെടുമ്പാശേരിയില്‍ നിന്നുളള വിമാനങ്ങളും റദ്ദാക്കി. സൗദി അറേബ്യയിലേക്കും മലേഷ്യയിലേക്കും കൊച്ചിയില്‍ നിന്ന് സര്‍വീസ് നടത്തുന്ന വിമാനങ്ങളാണ് റദ്ദാക്കിയത്. സൗദി എയര്‍ലൈന്‍സിന്റെ സര്‍വീസുകളാണ് റദ്ദാക്കിയത്. മലേഷ്യയിലേക്കുളള സര്‍വീസുകള്‍ വെട്ടിക്കുറച്ചിട്ടുണ്ടന്നും അധികൃതര്‍ പറഞ്ഞു.