കോഴിക്കോട്ടെ വ്യാപാരികള്‍ക്ക് ഐക്യദാര്‍ഢ്യം പ്രഖ്യാപിച്ച് എസ്ഡിപിഐ

കോഴിക്കോട്: എല്ലാ ദിവസവും കടകള്‍ തുറക്കാന്‍ അനുവദിക്കണമെന്നാവശ്യപ്പെട്ട് കോഴിക്കോട് വ്യാപാരികള്‍ നടത്തുന്ന പ്രതിഷേധത്തിന് ഐക്യദാര്‍ഢ്യം പ്രഖ്യാപിച്ച് എസ്ഡിപിഐ. വ്യാപാരികള്‍ക്ക് പിന്തുണ അറിയിച്ച് എസ്ഡിപിഐ കോഴിക്കോട് സിറ്റി കമ്മിറ്റി നടത്തിയ പ്രതിഷേധ പരിപാടി സംസ്ഥാന സെക്രട്ടറി മുസ്തഫ കൊമ്മേരി ഉദ്ഘാടനം ചെയ്തു. കെ ഷമീര്‍, കെ പി ജാഫര്‍ എന്നിവര്‍ നേതൃത്വം നല്‍കി. വ്യാപാരികള്‍ എസ്ഡിപിഐ പ്രവര്‍ത്തകര്‍ക്ക് പ്രത്യഭിവാദ്യം ചെയ്തു.

കൊവിഡ് പ്രോട്ടോക്കോള്‍ ചൂണ്ടിക്കാട്ടിയാണ് പോലിസ് മിഠായിത്തെരുവില്‍ കടകള്‍ തുറക്കുന്നതിന് വിലക്കേര്‍പ്പെടുത്തിയത്. ഇതെത്തുടര്‍ന്ന് വ്യാപാരി വ്യവസായ ഏകോപന സമിതിയുടെ നേതൃത്വത്തില്‍ കട തുറക്കാനെത്തിയ വ്യാപാരികളും പോലിസും തമ്മില്‍ സംഘര്‍ഷമുണ്ടായി.

കോഴിക്കോട് കോര്‍പറേഷന്‍ സി കാറ്റഗറിയില്‍ പെട്ടതിനാല്‍ ഇന്ന് കടകള്‍ തുറക്കരുതെന്നായിരുന്നു ആരോഗ്യവകുപ്പിന്റെയും പോലിസിന്റെയും മുന്നറിയിപ്പ്. ഇതില്‍ പ്രതിഷേധിച്ചും എല്ലാ ദിവസവും കടകള്‍ തുറക്കാന്‍ അനുവദിക്കണമെന്നും ആവശ്യപ്പെട്ടാണ് വ്യാപാരികള്‍ പ്ലക്കാര്‍ഡുകളുമേന്തി കടകള്‍ തുറന്ന് പ്രതിഷേധിക്കാനെത്തിയത്.