കോഴിക്കോട് കായക്കൊടിയില്‍ ഭൂചലനമുണ്ടായതായി നാട്ടുകാര്‍

കോഴിക്കോട്: കുറ്റ്യാടി പ്രദേശത്ത് ഭൂചലനം അനുഭവപ്പെട്ടതായി നാട്ടുകാര്‍. കായക്കൊടി എള്ളിക്കാംപാറയിലാണ് ഭൂചലനമുണ്ടായതായി നാട്ടുകാര്‍ അറിയിക്കുന്നത്. കായക്കൊടി പഞ്ചായത്തിലെ 4, 5 വാര്‍ഡുകളില്‍ വെള്ളിയാഴ്ചയും ശനിയാഴ്ചയും ഭൂചലനം അനുഭവപ്പെട്ടതായാണ് നിലവിലെ വിവരം. ഇന്നലെ രാവിലെ 7.30-നാണ് ചെറിയ രീതിയില്‍ ഭൂചലനം ആദ്യം ഉണ്ടായത്. ഇന്ന് വൈകിട്ട് 7.30 ഓടെ വീണ്ടും ഭൂചലനമുണ്ടായി. ഇന്ന് കുറച്ചുകൂടി ശക്തിയിലാണ് അനുഭവപ്പെട്ടതെന്നും പ്രദേശവാസികള്‍ പറയുന്നു.

സെക്കന്റുകള്‍ മാത്രം നീണ്ടു നിന്ന ഭൂചലനത്തെത്തുടര്‍ന്ന് അന്തരീക്ഷത്തില്‍ പ്രത്യേക ശബ്ദം അനുഭവപ്പെട്ടതായും നാട്ടുകാര്‍ പറഞ്ഞു. പരിഭ്രാന്തരായ ജനം വീടുവിട്ട് പുറത്തിറങ്ങി. റവന്യൂ ഉദ്യോഗസ്ഥരോട് സ്ഥലത്ത് പരിശോധന നടത്താന്‍ ആവശ്യപ്പെട്ടിട്ടുണ്ടന്ന് ജില്ലാ ഭരണകൂടം അറിയിച്ചു. വില്ലേജ് ഓഫീസര്‍ ഉള്‍പ്പെടെയുള്ളവര്‍ സ്ഥലത്തെത്തി. നാളെ വിദഗ്ധസംഘം പരിശോധന നടത്തും.