കോഴിക്കോട്ട് ഗവ. റെസിഡന്‍ഷ്യല്‍ സ്‌കൂളില്‍ ഭക്ഷ്യവിഷബാധ; ഛര്‍ദിയും വയറുവേദനയും, 31 കുട്ടികള്‍ ചികില്‍സ തേടി

കോഴിക്കോട്: കുറ്റ്യാടി മരുതോങ്കര അംബേദ്കര്‍ ഗവ. മോഡല്‍ റെസിഡന്‍ഷ്യല്‍ സ്‌കൂളില്‍ ഭക്ഷ്യ വിഷബാധ. ഞായറാഴ്ച രാത്രി ഭക്ഷണം കഴിച്ച 31 വിദ്യാര്‍ഥിനികള്‍ക്കാണ് വയറുവേദനയും ഛര്‍ദിയും അനുഭവപ്പെട്ടത്. 31 വിദ്യാര്‍ഥിനികളും മരുതോങ്കര കുടുംബാരോഗ്യകേന്ദ്രത്തില്‍ ചികില്‍സ തേടി.

ഞായറാഴ്ച പാകംചെയ്ത ചിക്കന്‍ കറിയില്‍ നിന്നാണ് ഭക്ഷ്യ വിഷബാധയുണ്ടായതെന്നാണ് സംശയം. രാത്രി ഭക്ഷണം കഴിച്ചതിന് പിന്നാലെ ഏതാനും വിദ്യാര്‍ഥിനികള്‍ക്ക് അസ്വസ്ഥത അനുഭവപ്പെട്ടിരുന്നു. തിങ്കളാഴ്ച രാവിലെ കൂടുതല്‍ വിദ്യാര്‍ഥിനികള്‍ക്ക് വയറുവേദനയും ഛര്‍ദിയും അനുഭവപ്പെടുകയായിരുന്നു. ഇതോടെയാണ് വിദ്യാര്‍ഥിനികളെ ആരോഗ്യകേന്ദ്രത്തില്‍ പ്രവേശിപ്പിച്ചത്.

നിലവില്‍ ആശങ്കപ്പെടേണ്ട സാഹചര്യമില്ലെന്നും എല്ലാവരുടെയും ആരോഗ്യനില തൃപ്തികരമാണെന്നും ആരോഗ്യവകുപ്പ് അധികൃതര്‍ അറിയിച്ചു. സംഭവത്തിന് പിന്നാലെ ഹെല്‍ത്ത് സൂപ്പര്‍വൈസറുടെ നേതൃത്വത്തില്‍ സ്‌കൂളില്‍ ആരോഗ്യവകുപ്പ് പരിശോധന നടത്തി.