'ഈ വർഗീയ പ്രകോപനങ്ങൾ നിർത്തുക'; രാമനവമി ആക്രമണത്തിൽ മൗനംവെടിഞ്ഞ് സിപിഎം

ന്യൂഡൽഹി: രാമനവമി ആഘോഷത്തോടനുബന്ധിച്ച് മുസ്‌ലിംകൾക്കെതിരേ ഉത്തരേന്ത്യയിൽ കഴിഞ്ഞ ഒരാഴ്ച്ചയിലധികമായി തുടരുന്ന വംശീയാതിക്രമത്തിൽ മൗനംവെടിഞ്ഞ് സിപിഎം. ആർഎസ്എസ്-ബിജെപി-വിഎച്ച്പി സംഘങ്ങൾ നടത്തുന്ന വർഗീയ പ്രകോപനങ്ങൾ നിർത്തണമെന്ന് സിപിഎം പൊളിറ്റ് ബ്യൂറോ പ്രസ്താവനയിലൂടെ ആവശ്യപ്പെട്ടു.

മധ്യപ്രദേശിലെ ഖാർഗോണിലും ബർവാനിയിലും ഗുജറാത്ത്, ജാർഖണ്ഡ്, പശ്ചിമ ബംഗാൾ, ഗോവ, കർണാടക എന്നിവിടങ്ങളിലും മുംബൈയിലും ഹിന്ദുത്വ ആക്രമണം അരങ്ങേറിയിരുന്നു. ഡൽഹിയിലെ ജവഹർലാൽ നെഹ്‌റു സർവകലാശാലയിലും അക്രമം നടന്നെങ്കിലും മുസ് ലിം സംഘടനകളല്ലാതെ മറ്റൊരു രാഷ്ട്രീയ പാർട്ടികളും പ്രതികരിക്കാൻ തയ്യാറായിരുന്നില്ല. അക്രമത്തിൽ മൗനം നടിക്കുന്ന മേൽക്കോയ്മാ രാഷ്ട്രീയ പ്രസ്ഥാനങ്ങൾക്കെതിരേ വിവിധ മേഖലകളിൽ നിന്ന് വിമർശനങ്ങൾ ഉയർന്ന സാഹചര്യത്തിലാണ് സിപിഎം പ്രതികരണം പുറത്തുവന്നത്.

മധ്യപ്രദേശ്, ബിഹാർ, മഹാരാഷ്ട്ര, പശ്ചിമ ബംഗാൾ, ജാർഖണ്ഡ് തുടങ്ങി നിരവധി സംസ്ഥാനങ്ങളിൽ രാമനവമിയുടെ ഘോഷയാത്രയ്ക്കിടെ നടന്ന വർഗീയ അക്രമങ്ങൾ ആശങ്കാജനകമാണ്. ന്യൂനപക്ഷങ്ങൾ അധിവസിക്കുന്ന മേഖലകളിലൂടെ കടന്നുപോകുമ്പോൾ ഏറ്റവും പ്രകോപനപരമായ മുദ്രാവാക്യങ്ങൾ വിളിച്ച് അക്രമാസക്തമായ സായുധ ഘോഷയാത്രകൾ നടത്തുന്ന ഒരു മാതൃകയാണ് ഈ പ്രദേശങ്ങളിൽ ഉണ്ടായതെന്ന് റിപോർട്ടുകൾ സൂചിപ്പിക്കുന്നുവെന്ന് പിബി പ്രസ്താവനയിൽ പറയുന്നു.

ഖാർഗോണിൽ നടന്ന അത്തരത്തിലുള്ള ആദ്യത്തെ സംഭവത്തിൽ, ഡൽഹിയിൽ വർഗീയ കലാപത്തിന് മുമ്പ് നടത്തിയതുപോലുള്ള തുടർച്ചയായ വിദ്വേഷ പ്രസംഗങ്ങളുടെ പേരിൽ കുറ്റവാളിയായ ബിജെപി നേതാവ് കപിൽ ശർമ്മ പ്രദേശത്തുണ്ടായിരുന്നു എന്നത് യാദൃശ്ചികമല്ല. ബിഹാറിൽ പോലിസിന്റെ സാന്നിധ്യത്തിൽ മുസ് ലിം പള്ളിയിൽ കാവി പതാക നാട്ടിയതുപോലുള്ള അങ്ങേയറ്റം പ്രതിഷേധാർഹമായ സംഭവങ്ങൾ ഉണ്ടായിട്ടുണ്ട്. ഡൽഹിയിലെ ജെഎൻയു കാംപസിൽ, രാമനവമിയുടെ പേരിൽ സംഘപരിവാർ സംഘടനയായ എബിവിപി, മാംസാഹാരം നൽകുന്നത് തടയാൻ ഹോസ്റ്റൽ കാന്റീനിൽ മെസ് ജീവനക്കാരെ ആക്രമിക്കുകയും തുടർന്ന് അവരെ രക്ഷിക്കാൻ എത്തിയ വിദ്യാർഥികളെ ആക്രമിക്കുകയും ചെയ്തുവെന്ന് പ്രസ്താവന അടിവരയിടുന്നു.

മധ്യപ്രദേശ്, ഗുജറാത്ത്, ബിഹാർ എന്നിവിടങ്ങളിലെ ഭരണ സംവിധാനങ്ങളുടെ ആക്രമണത്തിലുള്ള പങ്ക് സംശയാസ്പദമാണ് കൂടാതെ, മധ്യപ്രദേശിൽ ന്യായമായ നടപടിക്രമങ്ങളില്ലാതെ, "കലാപകാരികൾ" എന്ന് ആരോപിക്കപ്പെടുന്ന ന്യൂനപക്ഷ സമുദായത്തിൽ നിന്നുള്ള മിക്കവാറും എല്ലാവരുടെയും സ്വത്ത് നശിപ്പിക്കപ്പെട്ടു. ഇത് ഇന്ത്യയുടെ നിയമത്തെയും ഭരണഘടനയേയും ഇടിച്ചുനിരത്തുകയല്ലാതെ മറ്റൊന്നുമല്ല. ഏഴ് സംസ്ഥാനങ്ങളിൽ ഇത്തരം സംഭവങ്ങൾ ഉണ്ടായിട്ടും പ്രധാനമന്ത്രിയുടെ കാതടപ്പിക്കുന്ന മൗനം ഈ സംഭവങ്ങൾക്ക് അധികാരത്തിലുള്ളവരുടെ രക്ഷാകർതൃത്വമുണ്ടെന്ന ആശങ്ക വർധിപ്പിക്കുന്നതായി പ്രസ്താവന ചൂണ്ടിക്കാട്ടുന്നു.

ആർഎസ്എസ് സംഘപരിവാർ വർഗീയ രാഷ്ട്രീയം വളർത്താൻ മതപരമായ ഉൽസവങ്ങളെ ഉപയോഗിക്കുന്നതിനെ സിപിഎം അപലപിക്കുന്നു. മതത്തിന്റെ പേരിൽ ജനങ്ങളെ ഭിന്നിപ്പിക്കാൻ ആഗ്രഹിക്കുന്നവരുടെ ലക്ഷ്യം തകർക്കാനും സമാധാനം നിലനിർത്താനും എല്ലാ വിഭാഗം ജനങ്ങളോടും അഭ്യർത്ഥിക്കുന്നു. ഉചിതമായ പ്രവർത്തനങ്ങളിലൂടെ സമാധാനവും സൗഹാർദ്ദവും നിലനിർത്താൻ പ്രവർത്തിക്കാൻ സിപിഎം അതിന്റെ പ്രാഥമിക ഘടകങ്ങളോട് ആവശ്യപ്പെട്ടു.