ജമ്മു കശ്മീര്: മുന് മുഖ്യമന്ത്രിമാരായ ഉമര് അബ്ദുല്ലയും മെഹബൂബ മുഫ്തിയും അറസ്റ്റില്
ഇരുവരെയും അറസ്റ്റ് ചെയ്ത ശേഷം സര്ക്കാര് അതിഥി മന്ദിരത്തിലേക്ക് മാറ്റിയെന്നാണ് റിപ്പോര്ട്ട്.
ശ്രീനഗര്: ജമ്മു കശ്മീര് മുന് മുഖ്യമന്ത്രിയും പിഡിപി നേതാവുമായ മെഹബൂബ മുഫ്തിയെ അറസ്റ്റ് ചെയ്തതിന് പിന്നാലെ മറ്റൊരു മുന് മുഖ്യമന്ത്രി നാഷണല് കോണ്ഫറന്സ് നേതാവുമായ ഉമര് അബ്ദുല്ലയെയും അറസ്റ്റ് ചെയ്തു. ഇരുവരെയും അറസ്റ്റ് ചെയ്ത ശേഷം സര്ക്കാര് അതിഥി മന്ദിരത്തിലേക്ക് മാറ്റിയെന്നാണ് റിപ്പോര്ട്ട്.
ഭരണഘടനയുടെ 370 ആം അനുച്ഛേദം റദ്ദാക്കുന്ന തീരുമാനം ഇന്ത്യയുടെ കറുത്ത ദിനമാണെന്നായിരുന്നു മെഹ്ബൂബ മുഫ്തി പ്രതികരിച്ചത്. തീരുമാനം ജനാധിപത്യ വിരുദ്ധമാണെന്നും കേന്ദ്ര സര്ക്കാര് തീരുമാനം മഹാദുരന്തമാണെന്നും ജമ്മു കശ്മീര് മുന് മുഖ്യമന്ത്രി മെഹബൂബ മുഫ്തി ട്വിറ്ററിലൂടെ തുറന്നടിച്ചിരുന്നു. സമാനമായ അഭിപ്രായം ഉമര് അബ്ദുല്ലയും പ്രകടിപ്പിച്ചിരുന്നു. തീരുമാനം ഞെട്ടിക്കുന്നതും ഗുരുതര പ്രത്യാഘാതങ്ങളുണ്ടാക്കുന്നതുമാണെന്നായിരുന്നു ഒമര് അബ്ദുല്ലയുടെ പ്രതികരണം.