ബിജെപിയിലേക്കെന്ന അഭ്യൂഹങ്ങള്‍ക്കിടെ വീടിന് പുറത്തെ 'ജയ് ശ്രീറാം' പതാക അഴിച്ചുമാറ്റി കമല്‍നാഥ്
കഴിഞ്ഞ വര്‍ഷം മധ്യപ്രദേശില്‍ നടന്ന നിയമസഭാ തിരഞ്ഞെടുപ്പില്‍ ബിജെപിയോട് കോണ്‍ഗ്രസ് കനത്ത തോല്‍വി ഏറ്റുവാങ്ങിയതോടെ അധ്യക്ഷ സ്ഥാനത്ത് നിന്ന് നീക്കിയിരുന്നു. ഇതോടെയാണ് കമല്‍നാഥ് പാര്‍ട്ടിയുമായി അകന്നത്. ഇന്ദിരാഗാന്ധി മുതല്‍ നെഹ്‌റു കുടുംബവുമായി അടുത്ത ബന്ധം പുലര്‍ത്തുന്ന നേതാവാണ് കമല്‍നാഥ്. മധ്യപ്രദേശിലെ ചിന്ദ്‌വാര മണ്ഡലത്തില്‍ പ്രചാരണത്തിനെത്തിയപ്പോള്‍ മുന്‍ പ്രധാനമന്ത്രിയായിരുന്ന ഇന്ദിരാഗാന്ധി കമല്‍നാഥിനെ തന്റെ മൂന്നാമത്തെ മകന്‍ എന്നാണ് വിളിച്ചിരുന്നത്. ഒമ്പത് തവണ എംപിയായിരുന്നു കമല്‍നാഥ്. അതേസമയം, കമല്‍നാഥ് ബിജെപിയില്‍ ചേരുന്നില്ലെന്നും മാധ്യമങ്ങളില്‍ പ്രചരിക്കുന്ന റിപോര്‍ട്ടുകള്‍ ഗൂഢാലോചനയുടെ ഭാഗമാണെന്ന് അദ്ദേഹത്തിന്റെ പിന്‍ഗാമിയായ ജിതു പട്വാരി പറഞ്ഞു.
കമല്‍നാഥുമായി ഞാന്‍ സംസാരിച്ചിരുന്നു. താന്‍ കോണ്‍ഗ്രസുകാരനാണെന്നും കോണ്‍ഗ്രസില്‍ തന്നെ തുടരുമെന്നും അദ്ദേഹം പറഞ്ഞതായി പട്വാരി പറഞ്ഞു. 'ഗാന്ധി കുടുംബവുമായുള്ള അദ്ദേഹത്തിന്റെ ബന്ധം അചഞ്ചലമാണ്. കോണ്‍ഗ്രസിന്റെ പ്രത്യയശാസ്ത്രത്തിനൊപ്പം ജീവിച്ച അദ്ദേഹം അവസാനം വരെ അതില്‍ തുടരും. ഇതാണ് അദ്ദേഹം എന്നോട് പറഞ്ഞതെന്നും അദ്ദേഹം കൂട്ടിച്ചേര്‍ത്തു.