സമാധാന ചര്ച്ചകള് ഉടന് ആരംഭിക്കണമെന്ന് ഇറാനോട് ചൈന; താല്ക്കാലിക വെടിനിര്ത്തല് അല്ല, സമഗ്ര സമാധാനമാണ് ലക്ഷ്യമെന്ന് ഇറാന്
സമാധാന ചര്ച്ചകള് എത്രയും വേഗം ആരംഭിക്കണമെന്ന് ഇറാനോട് ആവശ്യപ്പെട്ടതായി ചൈനീസ് വിദേശകാര്യമന്ത്രി വാങ് യി പറഞ്ഞു. ഇറാന് വിദേശകാര്യ മന്ത്രി അബ്ബാസ് അരാഗ്ച്ചിയുമായി നടത്തിയ ഫോണ് സംഭാഷണത്തിന്റെ വിവരങ്ങളാണ് ചൈനീസ് വിദേശകാര്യമന്ത്രാലയം പുറത്ത് വിട്ടത്.
സമാധാന ചര്ച്ചകള് ആരംഭിക്കുന്നതിനുള്ള എല്ലാ അവസരങ്ങളും എത്രയും വേഗം പ്രയോജനപ്പെടുത്തണമെന്ന് ആവശ്യപ്പെട്ടതായി വിദേശകാര്യ മന്ത്രാലയത്തിന്റെ പ്രസ്താവനയില് പറയുന്നു.
യുദ്ധം ചെയ്യുന്നതിനേക്കാള് എപ്പോഴും ചര്ച്ചകളാണ് നല്ലതെന്ന് വാങ് അരാഗ്ച്ചിയോട് പറഞ്ഞു. 'എല്ലാ ഹോട്ട്സ്പോട്ട് പ്രശ്നങ്ങളും ബലപ്രയോഗത്തിലൂടെയല്ല, സംഭാഷണത്തിലൂടെയും ചര്ച്ചകളിലൂടെയും പരിഹരിക്കണം' എന്നും അദ്ദേഹം കൂട്ടിച്ചേര്ത്തു.
'താല്ക്കാലിക വെടിനിര്ത്തല് മാത്രമല്ല, സംഘര്ഷത്തിന് സമഗ്രമായ ഒരു അന്ത്യം കൈവരിക്കാന് ഇറാന് പ്രതിജ്ഞാബദ്ധമാണ്' എന്ന് അരാഗ്ച്ചി വാങിനോട് പറഞ്ഞു. കൂടാതെ ചൈനയുടെ മാനുഷിക സഹായത്തിന് നന്ദി പറഞ്ഞുവെന്നും പ്രസ്താവനയില് കൂട്ടിച്ചേര്ത്തു. ഇറാനിയന് പക്ഷത്തിന്റെ അഭ്യര്ത്ഥന മാനിച്ചാണ് ഈ ആഹ്വാനം നടത്തിയതെന്ന് മന്ത്രാലയം വ്യക്തമാക്കി.
ചൈന ഇറാന്റെ ഒരു പ്രധാന പങ്കാളിയായി തുടരുന്നു എന്നാല്, യുഎസ് താവളങ്ങള്ക്ക് ആതിഥേയത്വം വഹിക്കുന്ന ഗള്ഫ് രാജ്യങ്ങള്ക്ക് നേരെ തെഹ്റാന് നടത്തുന്ന ആക്രമണങ്ങളോട് യോജിക്കുന്നില്ല എന്നും വെടിനിര്ത്തലിന് ഇറാനെ പ്രേരിപ്പിച്ചുവെന്നും പ്രസ്താവനയില് പറഞ്ഞു.