'തുല്യാവകാശം ഭരണപങ്കാളിത്തം'; കാബൂള്‍ തെരുവില്‍ സമരവുമായി വനിതകള്‍ (വീഡിയോ)
കാബൂള്‍: തുല്യാവകാശങ്ങളും ഭരണപങ്കാളിത്തവും വേണമെന്ന് ആവശ്യപ്പെട്ട് കാബൂള്‍ തെരുവില്‍ പ്ലക്കാര്‍ഡുകളുമായി വനിതകളുടെ സമരം. നാല് സ്ത്രീകളാണ് മുദ്രാവാക്യങ്ങള്‍ എഴുതിയ പ്ലക്കാര്‍ഡുകളുമായി തെരുവിലിറങ്ങിയത്.
മാധ്യപ്രവര്‍ത്തകയും ആക്ടിവിസ്റ്റുമായ മസിഹ് അലിനെജാദ് ആണ് താലിബാന്‍ കാബൂള്‍ കീഴടക്കിയതിന് ശേഷമുള്ള വീഡിയോ ഷെയര്‍ ചെയ്തിരിക്കുന്നത്. ആയുധധാരികളായ താലിബാന്‍ പ്രവര്‍ത്തകര്‍ സുരക്ഷയൊരുക്കി സമരക്കാര്‍ക്ക് സമീപം നില്‍ക്കുന്നതും വീഡിയോയില്‍ കാണാം.
താലിബാനെതിരേ സമരവുമായി തെരുവില്‍ ഇറങ്ങിയ ധീര വനിതകള്‍ എന്ന അടിക്കുറിപ്പോടെയാണ് മസിഹ് തന്റെ ട്വിറ്റര്‍ പേജില്‍ വീഡിയോ പങ്ക് വച്ചിരിക്കുന്നത്. വിദ്യാഭ്യാസത്തിനും ജോലി ചെയ്യാനും ഭരണ പങ്കാളിത്തവും ആവശ്യപ്പെട്ടാണ് അവര്‍ തെരുവില്‍ ഇറങ്ങിയിരിക്കുന്നതെന്നും മസിഹ് പറയുന്നു. കൂടുതല്‍ സ്ത്രീകള്‍ സമരത്തില്‍ പങ്കാളികളാകുമെന്ന പ്രതീക്ഷയും മസിഹ് പങ്കുവച്ചു.