സഹല്‍ കളിച്ചേക്കും; ലൂണയുടെ കാര്യം സംശയത്തില്‍
ലൂണ മെഡിക്കല്‍ ടീമിനൊപ്പമാണ്.
പനാജി: നാളെ ഹൈദരാബാദ് എഫ്‌സിക്കെതിരേ ഐഎസ്എല്‍ ഫൈനലില്‍ കളിക്കുന്ന കേരളാ ബ്ലാസ്റ്റേഴ്സ് ആരാധകര്‍ക്ക് ആശ്വാസവും ആശങ്കയും. പരിക്കിന്റെ പിടിയിലുള്ള മലയാളി താരം സഹല്‍ അബ്ദുല്‍ സമദ് ഇന്ന് ടീമിനൊപ്പം പരിശീലനം ആരംഭിച്ചു. ബ്ലാസ്റ്റേഴ്സ് കോച്ച് ഇവാന്‍ വുകമാനോവിച്ചാണ് ഇക്കാര്യം അറിയിച്ചത്. സഹലിന്റെ പരിക്ക് ആശങ്കയുള്ളതല്ല. താരം നാളെ കളിച്ചേക്കുമെന്നും കോച്ച് സൂചന നല്‍കി. അതിനിടെ സൂപ്പര്‍ താരം അഡ്രിയാന്‍ ലൂണയ്ക്ക് ആരോഗ്യ പ്രശ്‌നങ്ങള്‍ ഉണ്ടെന്നും താരം നാളെ കളിക്കാന്‍ സാധ്യത കുറവാണെന്നും കോച്ച് വ്യക്തമാക്കി. ലൂണ മെഡിക്കല്‍ ടീമിനൊപ്പമാണ്. ലൂണ ഫൈനലില്‍ കളിക്കുന്നതിന്റെ അന്തിമ തീരുമാനം വന്നിട്ടില്ലെന്നും കോച്ച് പറഞ്ഞു.