ഗോകുലം കേരളയുടെ സ്പാനിഷ് താരം മത്യാസ് ഹെര്ണാണ്ടസിനെ തട്ടകത്തിലെത്തിച്ച് കൊമ്പന്മാര്
കൊച്ചി: ഇന്ത്യന് സൂപ്പര് ലീഗ് പന്ത്രണ്ടാം സീസണിലെ മുന്നൊരുക്കങ്ങളുടെ ഭാഗമായി മധ്യനിര ശക്തിപ്പെടുത്താന് കേരളത്തിന്റെ കൊമ്പന്മാര്. മത്യാസ് ഹെര്ണാണ്ടസെന്ന സ്പാനിഷ് താരവുമായി ബ്ലാസ്റ്റേഴ്സ് കരാറില് ഒപ്പുവച്ചു. ഗോകുലം കേരള എഫ്.സിയില് നിന്നാണ് ഈ മുപ്പതുകാരനായ സ്പാനിഷ് താരത്തിന്റെ വരവ്. മധ്യനിരയില് കൂടുതല് നിയന്ത്രണവും ഓപ്ഷനുകളും ഉറപ്പാക്കാന് ഈ സൈനിംഗ് ടീമിനെ സഹായിക്കും.
വലംകാലന് ഡിഫന്സീവ് മിഡ്ഫീല്ഡറായ ഹെര്ണാണ്ടസ്, കളിയിലെ അച്ചടക്കത്തിനും പ്രതിരോധത്തിലെ സാന്നിധ്യത്തിനും ഏറെ ശ്രദ്ധേയനാണ്. 1.86 മീറ്റര് ഉയരമുള്ള താരം ഏരിയല് ഡ്യുവലുകളിലും ശാരീരികക്ഷമത ആവശ്യമുള്ള സാഹചര്യങ്ങളിലും ടീമിന് ഗുണകരമാകും. സാഹചര്യങ്ങള് മുന്കൂട്ടി മനസ്സിലാക്കി കളിക്കാനുള്ള കഴിവും പ്രതിരോധ നിരയെ ഏകോപിപ്പിക്കുന്നതിലെ മികവും അദ്ദേഹത്തിന്റെ സവിശേഷതകളാണ്.
സ്പെയിനിലെ സലാമാങ്കയില് ജനിച്ച താരം, സിഡി ലറെഡോ, സലാമാങ്ക സിഎഫ് യുഡിഎസ്, യുഡി ഫോര്മെന്ററ തുടങ്ങി വിവിധ വിദേശ ക്ലബ്ബുകള്ക്കായി ബൂട്ടണിഞ്ഞിട്ടുണ്ട്. വിവിധ ഫുട്ബോള് സാഹചര്യങ്ങളില് നിന്നുള്ള അനുഭവസമ്പത്തുമായാണ് ബ്ലാസ്റ്റേഴ്സിന്റെ തട്ടകത്തില്ക്ക് എത്തുന്നത്. പുതിയ ഐഎസ്എല് സീസണിന് മുന്നോടിയായുള്ള ക്ലബ്ബിന്റെ പ്രീസീസണ് ക്യാംപില് മത്യാസ് ഉടന് തന്നെ ചേരും.
'മധ്യനിരയില് വ്യക്തതയും അച്ചടക്കവും കൊണ്ടുവരുന്ന താരമാണ് മത്യാസ്. അദ്ദേഹത്തിന്റെ പ്രൊഫൈല് ടീമിന് കൂടുതല് ഓപ്ഷനുകള് നല്കുന്നു. ആവശ്യമുള്ളപ്പോള് പ്രതിരോധ നിരയിലും സഹായകമാകാന് അദ്ദേഹത്തിന് സാധിക്കും. മത്യാസിനെ കേരള ബ്ലാസ്റ്റേഴ്സിലേക്ക് സ്വാഗതം ചെയ്യുന്നു'; മത്യാസ് ഹെര്ണാണ്ടസിന്റെ സൈനിംഗിനെക്കുറിച്ച് കേരള ബ്ലാസ്റ്റേഴ്സ് സിഇഒ അഭിക് ചാറ്റര്ജി വ്യക്തമാക്കി.