കൊച്ചിയിലെ ഐഎസ്എല്‍ സീസണ്‍ പരാജയത്തോടെ അവസാനിപ്പിച്ച് ബ്ലാസ്റ്റേഴ്സ്
മലയാളി താരം വിപിന്‍ മോഹന്‍ ഇന്ന് ബ്ലാസ്‌റ്റേഴ്‌സിനായി ഇറങ്ങിയിരുന്നു.
കൊച്ചി: ഹോം ഗ്രൗണ്ടിലെ പരാജയത്തോടെ ബ്ലാസ്റ്റേഴ്സ് ഐഎസ്എല്‍ 2022-23 സീസണില്‍ കൊച്ചിയോട് വിടപറഞ്ഞു. ഈ സീസണിലെ കൊച്ചിയിലെ അവസാന മല്‍സരമാണ് ഹൈദരാബാദിനോട് ഇന്ന് ബ്ലാസ്റ്റേഴ്സ് കളിച്ചത്. തോല്‍വിയോടെ അവര്‍ ഹോം ഗ്രൗണ്ടിനോട് വിടപറഞ്ഞു. എതിരില്ലാത്ത ഒരു ഗോളിനാണ് മഞ്ഞപ്പടയുടെ തോല്‍വി. 29ാം മിനിറ്റില്‍ ബോര്‍ജാ ഹെരേര നേടിയ ഗോളിലൂടെയാണ് ഹൈദരാബാദ് ജയിച്ചത്. മലയാളി താരം വിപിന്‍ മോഹന്‍ ഇന്ന് ബ്ലാസ്‌റ്റേഴ്‌സിനായി ഇറങ്ങിയിരുന്നു. ആദ്യ പകുതിയില്‍ കാര്യമായ നീക്കം നടത്താന്‍ മഞ്ഞപ്പടയ്ക്കായില്ല. എന്നാല്‍ രണ്ടാം പകുതിയില്‍ പൊരുതിയെങ്കിലും സമനില പിടിക്കാന്‍ പോലും ബ്ലാസ്‌റ്റേഴ്‌സിന് ആയില്ല. ലീഗില്‍ അഞ്ചാം സ്ഥാനത്താണ് ബ്ലാസ്റ്റേഴ്സ് ഫിനിഷ് ചെയ്തത്. പ്ലേ ഓഫിലെ എതിരാളി ബെംഗളൂരു എഫ്‌സിയാണ്. ബെംഗളൂരുവിലാണ് മല്‍സരം.