കൊല്ലങ്കോട്: പ്രായപൂര്‍ത്തിയാവാത്ത പെണ്‍കുട്ടി സ്വകാര്യാശുപത്രിയില്‍ ജീവനില്ലാത്ത പെണ്‍കുഞ്ഞിനു ജന്‍മം നല്‍കിയ സംഭവവുമായി ബന്ധപ്പെട്ട് യുവാവിനെ പോക്‌സോ കേസില്‍ അറസ്റ്റ് ചെയ്തു. ആനമാറി സ്വദേശി പ്രവീണ്‍കുമാര്‍ (24) ആണ് അറസ്റ്റിലായത്. 17 വയസ്സുള്ള പെണ്‍കുട്ടി 26 ന് രാത്രിയാണ് സ്വകാര്യാശുപത്രിയില്‍ ജീവനില്ലാത്ത കുഞ്ഞിനു ജന്‍മം നല്‍കിയത്. കുഞ്ഞിനെ പ്രവീണ്‍കുമാര്‍ കൊണ്ടുപോയി മറവുചെയ്തു. ആശുപത്രിയില്‍നിന്ന് വിവരമറിയിച്ചതിനെത്തുടര്‍ന്ന് 27ന് വൈകീട്ട് കൊല്ലങ്കോട് പോലിസ് പോക്‌സോ നിയമപ്രകാരം കേസെടുത്തു.
രാത്രി അറസ്റ്റ് ചെയ്ത പ്രവീണ്‍ കുമാറിനെ ആലത്തൂര്‍ സബ് ജയിലിലേക്കു റിമാന്‍ഡ് ചെയ്തു. ഇന്നലെ ചിറ്റൂര്‍ തഹസില്‍ദാര്‍ ഡി അമൃതവല്ലി, എഎസ്പി പദം സിങ്, കൊല്ലങ്കോട് പോലിസ് ഇന്‍സ്‌പെക്ടര്‍ എ വിപിന്‍ദാസ് എന്നിവരുടെ നേതൃത്വത്തില്‍ ശിശുവിന്റെ മൃതദേഹം പുറത്തെടുത്ത് ഇന്‍ക്വസ്റ്റും പോലിസ് സര്‍ജന്‍ ഡോ.ജെറി ജോസഫിന്റെ നേതൃത്വത്തില്‍ പോസ്റ്റ്‌മോര്‍ട്ടവും നടത്തി ബന്ധുക്കള്‍ക്ക് വിട്ടുകൊടുത്തു. തുടര്‍ന്ന് വീണ്ടും മൃതദേഹം മറവുചെയ്തു.