ശബരിമല ദര്ശനത്തിനെത്തുന്നവര് കൊവിഡ് നെഗറ്റീവ് സര്ട്ടിഫിക്കറ്റ് കരുതണം: ഡിജിപി
സാനിറ്റൈസര്, കൈയുറകള് എന്നിവ നിര്ബന്ധമായും കൊണ്ടുവരികയും ഉപയോഗിക്കുകയും വേണം. നല്ല ഗുണനിലവാരമുള്ളതും വീണ്ടും ഉപയോഗിക്കാവുന്നതുമായ മാസ്ക്കുകള് കരുതണം.
തിരുവനന്തപുരം: ശബരിമല ദര്ശനത്തിനെത്തുന്ന ഭക്തര് ആചാരപ്രകാരമുള്ള സാധനങ്ങള് കൂടാതെ പരമാവധി കുറച്ചുസാധനങ്ങള് മാത്രമേ കൊണ്ടുവരാവൂ എന്ന് സംസ്ഥാന പോലിസ് മേധാവി ലോക്നാഥ് ബെഹ്റ അഭ്യര്ഥിച്ചു. സാനിറ്റൈസര്, കൈയുറകള് എന്നിവ നിര്ബന്ധമായും കൊണ്ടുവരികയും ഉപയോഗിക്കുകയും വേണം. നല്ല ഗുണനിലവാരമുള്ളതും വീണ്ടും ഉപയോഗിക്കാവുന്നതുമായ മാസ്ക്കുകള് കരുതണം.
ഭക്തര് സാമൂഹിക അകലം പാലിക്കണം. കൂട്ടമായി നടക്കാനോ മലകയറാനോ പാടില്ല. ദര്ശനത്തിനെത്തുന്നവര് 48 മണിക്കൂറിനകം ലഭ്യമായ കൊവിഡ് നെഗറ്റീവ് സര്ട്ടിഫിക്കറ്റ് കരുതേണ്ടതാണ്. കൂടാതെ മലകയറാന് പ്രാപ്തരാണെന്ന് സാക്ഷ്യപ്പെടുത്തിയ മെഡിക്കല് ഫിറ്റ്നസ് സര്ട്ടിഫിക്കറ്റ് കൂടെ കരുതണമെന്ന് സംസ്ഥാന പോലിസ് മേധാവി അഭ്യര്ഥിച്ചു.