രാഹുല് മാങ്കൂട്ടത്തില് കസ്റ്റഡിയില് ഇല്ല: പോലിസ്, ഹൊസ്ദുര്ഗ് കോടതി വളപ്പില് ഏര്പ്പെടുത്തിയിരുന്ന വന് പോലിസ് സന്നാഹം പിന്വലിച്ചു
കാസര്ഗോഡ്: രാഹുല് മാങ്കൂട്ടത്തില് കീഴടങ്ങുമെന്ന അഭ്യൂഹത്തെത്തുടര്ന്ന് ഹൊസ്ദുര്ഗ് കോടതി വളപ്പില് ഏര്പ്പെടുത്തിയിരുന്ന വന് പോലിസ് സന്നാഹം പിന്വലിച്ചു. ജോലി സമയം കഴിഞ്ഞ് മണിക്കൂറുകളോളം കാത്തിരുന്ന ജഡ്ജിയും മടങ്ങിപ്പോയി. രാഹുല് കസ്റ്റഡിയില് ഇല്ലെന്ന് പോലിസും സ്ഥിരീകരിച്ചു.
പാലക്കാട് എംഎല്എ രാഹുല് മാങ്കൂട്ടത്തില് കുടകില് ഒളിവില് കഴിയുകയാണെന്നും, ഹോസ്ദുര്ഗ് കോടതിയില് കീഴടങ്ങാനെത്തുമെന്നുമായിരുന്നു അഭ്യൂഹം. ഡിവൈഎസ്പി സുരേഷ് ബാബുവിന്റെ നേതൃത്വത്തിലാണ് ഇവിടെ വന് പോലിസ് സന്നാഹം ഒരുക്കിയിരുന്നത്.
കോടതി വളപ്പില് ഡിവൈഎഫ്ഐ പ്രവര്ത്തകര് ഉള്പ്പടെയുള്ളവര് എത്തിച്ചേര്ന്നിരുന്നു. രാഹുല് ജയിലില് പട്ടിണി കിടക്കേണ്ടി വരില്ലെന്ന പ്രഖ്യാപനവുമായി പൊതിച്ചോറുമായാണ് ഡിവൈഎഫ്ഐ പ്രവര്ത്തകര് എത്തിയത്. സര്ക്കാര് ആശുപത്രികളില് ഡിവൈഎഫ്ഐ നടത്തുന്ന പൊതിച്ചോര് വിതരണത്തെ രാഹുല് മുന്പ് പരിഹസിച്ചിരുന്നു.
രാഹുല് മാങ്കൂട്ടത്തിലിനെ പ്രത്യേക അന്വേഷണ സംഘം കസ്റ്റഡിയിലെടുത്തു കഴിഞ്ഞെന്നും, ഹോസ്ദുര്ഗ് കോടതിയില് ഹാജരാക്കാനാണ് കൊണ്ടുവരുന്നതെന്നും സ്ഥിരീകരിക്കാത്ത വിവരങ്ങള് പുറത്തുവന്നിരുന്നു. ഇതിനു പിന്നാലെയാണ്, രാത്രിയോടെ, രാഹുല് കസ്റ്റഡിയില് ഇല്ലെന്ന് പോലിസ് സ്ഥിരീകരിക്കുന്നത്.