പാലക്കാട്: വരും ദിവസങ്ങളില്‍ കേരളത്തില്‍ നാല് ഡിഗ്രി വരെ ചൂടുകൂടുമെന്ന് കേന്ദ്ര കാലാവസ്ഥ നിരീക്ഷണ കേന്ദ്രം. പാലക്കാട്, തൃശൂര്‍, മലപ്പുറം, കോഴിക്കോട് എന്നീ ജില്ലകളില്‍ എട്ട് ഡിഗ്രിയിലധികം ചൂട് കൂടുമെന്നും മുന്നറിയിപ്പുണ്ട്. സൂര്യാഘാതം ഏല്‍ക്കാതെ ജനങ്ങള്‍ ജാഗ്രത പാലിക്കണമെന്ന് ദുരന്ത നിവാരണ അതോറിറ്റി നിര്‍ദേശിച്ചു. 11 മണിമുതല്‍ മൂന്ന് മണി വരെ വെയില്‍ കൊള്ളരുത്. നിര്‍ജലീകരണം ഒഴിവാക്കാന്‍ ഇടക്കിടെ വെള്ളം കുടിക്കണം. തൊഴിലാളികള്‍ക്ക് സൂര്യാഘാതം ഏല്‍ക്കാനുള്ള സാധ്യത മുന്‍നിര്‍ത്തി തൊഴില്‍ സമയം സര്‍ക്കാര്‍ ക്രമീകരിച്ചിട്ടുണ്ട്. സ്‌കൂള്‍ വിദ്യാര്‍ഥികള്‍ കയ്യില്‍ എപ്പോഴും കുടിവെള്ളം കരുതണം. ഈ നിര്‍ദേശം എല്ലാവരും പാലിക്കണമെന്നും ദുരന്ത നിവാരണ അതോറിറ്റി ആവശ്യപ്പെട്ടു.