നഗ്നരാക്കി ലാത്തി കൊണ്ടടിച്ചു, നിര്ബന്ധിപ്പിച്ച് മദ്യം കുടിപ്പിച്ചു; പോലിസ് കസ്റ്റഡിയില് നിന്ന് മോചിതരായ വിദ്യാര്ഥികള്
ജാമിഅ മില്ലിയയിലെ വിദ്യാര്ഥികളെ കസ്റ്റഡിയില്വച്ച് പോലിസ് നിര്ബന്ധിച്ച് മദ്യം കുടിപ്പിക്കുകയും സ്റ്റേഷനുള്ളില് നഗ്നരാക്കിയശേഷം പോലിസ് ലാത്തികൊണ്ട് അടിക്കുകയും ചെയ്തതായി വിദ്യാര്ഥികള് പറഞ്ഞു.
ന്യൂഡല്ഹി: പൗരത്വ ഭേദഗതി നിയമത്തിനെതിരേ പ്രതിഷേധിച്ച വിദ്യാര്ഥികളെ പോലിസ് ക്രൂരമായി മര്ദിച്ചതായി ആരോപണം. ക്രൂരമായ വേട്ടയാടലുകളായിരുന്നു പോലിസിന്റെ ഭാഗത്തുനിന്നുണ്ടായതെന്നും വിദ്യാര്ഥികള് ആരോപിച്ചു. ജാമിഅ മില്ലിയയിലെ വിദ്യാര്ഥികളെ കസ്റ്റഡിയില്വച്ച് പോലിസ് നിര്ബന്ധിച്ച് മദ്യം കുടിപ്പിക്കുകയും സ്റ്റേഷനുള്ളില് നഗ്നരാക്കിയശേഷം പോലിസ് ലാത്തികൊണ്ട് അടിക്കുകയും ചെയ്തതായി വിദ്യാര്ഥികള് പറഞ്ഞു.
ഞായറാഴ്ച രാത്രി കസ്റ്റഡിയിലെടുത്ത അഞ്ച് വിദ്യാര്ഥികളാണ് മോചിതരായത്. വിദ്യാര്ഥികളിലൊരാള്ക്ക് ശരീരത്തില് മൂന്ന് പൊട്ടലുകളുണ്ട്. മറ്റുള്ളവര്ക്കും ശരീരത്തില് സാരമായ പരിക്കേറ്റിട്ടുണ്ട്. സാമൂഹ്യമാധ്യമങ്ങള് വഴിയാണ് വിദ്യാര്ഥികള് വെളിപ്പെടുത്തല് നടത്തിയത്. പോലിസ് സര്വകലാശാലാ കാംപസില് കയറി നടത്തിയ ആക്രമണത്തെത്തുടര്ന്ന് നിരവധി വിദ്യാര്ഥികള്ക്കാണു ഗുരുതരമായി പരിക്കേറ്റത്. ജാമിഅ വിദ്യാര്ഥികള്ക്ക് പിന്തുണയുമായി രാജ്യത്തെ വിവിധ സര്വകലാശാലകളിലെ വിദ്യാര്ഥികള് രംഗത്തെത്തിയിരുന്നു.