പരീക്ഷക്കിടെ പ്ലസ്ടു വിദ്യാര്‍ഥിനിയെ ലൈംഗികമായി ഉപദ്രവിച്ചു; ഇംഗ്ലീഷ് അധ്യാപകന്‍ അറസ്റ്റില്‍
ഹാജ്യാര്‍ മുഹമ്മദ് യൂസഫ് സര്‍ക്കാര്‍ സ്‌കൂളിലെ അധ്യാപകനായ മുരുഗേശനാണ് പിടിയിലായത്
ചെന്നൈ: പരീക്ഷക്കിടെ പന്ത്രണ്ടാം ക്ലാസ് വിദ്യാര്‍ഥിനിയെ ലൈംഗികമായി പീഡിപ്പിക്കാന്‍ ശ്രമിച്ച ഇംഗ്ലീഷ് അധ്യാപകന്‍ അറസ്റ്റില്‍. തമിഴ്‌നാട് ശ്രീരംഗത്താണ് സംഭവം. ഹാജ്യാര്‍ മുഹമ്മദ് യൂസഫ് സര്‍ക്കാര്‍ സ്‌കൂളിലെ അധ്യാപകനായ മുരുഗേശനാണ് പിടിയിലായത്. പരീക്ഷ എഴുതിക്കൊണ്ടിരിക്കെ അടുത്തെത്തിയ മുരുഗേശന്‍ തന്നോട് മോശമായി പെരുമാറുകയായിരുന്നുവെന്ന് പെണ്‍കുട്ടി പറഞ്ഞു.
വീട്ടിലെത്തിയ പെണ്‍കുട്ടി രക്ഷിതാക്കളോട് വിവരം പറയുകയായിരുന്നു. തുടര്‍ന്ന് അഞ്ഞൂറോളം ഗ്രാമീണര്‍ സ്‌കൂളിന് പുറത്ത് തടിച്ചുകൂടി പ്രതിഷേധിക്കുകയും ചെയ്തു. തുടര്‍ന്ന് ഇനാം കളത്തൂര്‍ പോലിസ് വിദ്യാര്‍ഥിനിയോടും സഹപാഠികളോടും അന്വേഷണം നടത്തുകയും ഇതിന്റെ അടിസ്ഥാനത്തില്‍ അധ്യാപകനെ അറസ്റ്റ് ചെയ്യുകയുമായിരുന്നു. പോക്‌സോ നിയമപ്രകാരം മരുഗേശനെതിരേ കേസെടുത്തു. സംഭവത്തില്‍ അന്വേഷണം പുരോഗമിക്കുകയാണ്.