ഗ്യാസ് സിലിണ്ടര്‍ പൊട്ടിത്തെറിച്ച് മകന് ദാരുണാന്ത്യം; മാതാപിതാക്കള്‍ക്ക് ഗുരുതര പരിക്ക്
ഹൈദരാബാദ്: ഗ്യാസ് സിലിണ്ടര്‍ പൊട്ടിത്തെറിച്ച് 18കാരന് ദാരുണാന്ത്യം. മാതാപിതാക്കള്‍ക്ക് ഗുരുതരമായി പരിക്കേറ്റു. ധൂല്‍പേട്ടിലാണ് സംഭവം. മാനവ് സിങ് (18) ആണ് മരിച്ചത്. മാതാപിതാക്കളായ നീരജ് സിങ് (48), സുചരിത സിങ് (43) എന്നിവര്‍ക്കാണ് പരിക്കേറ്റത്. മാതാവ് സുചരിതയുടെ കൈകള്‍ക്ക് പൊള്ളലേറ്റിട്ടുണ്ട്. നീരജിന് 70 ശതമാനത്തിലധികം പൊള്ളലേറ്റ് ഗുരുതരാവസ്ഥയിലാണെന്ന് പോലിസ് പറയുന്നു.
അനധികൃതമായി ഗ്യാസ് സിലിണ്ടര്‍ നിറച്ചുനല്‍കുന്ന സ്ഥലത്താണ് അപകടം നടന്നത്. സിലിണ്ടര്‍ നിറയ്ക്കുന്നതിനിടെയാണ് അപകടം സംഭവിച്ചത്. കുട്ടി സംഭവസ്ഥലത്തുതന്നെ മരിച്ചു. അപകടത്തില്‍ ഗുരുതരമായി പരിക്കേറ്റ മാതാപിതാക്കളെ കാഞ്ചന്‍ബാഗിലെ അപ്പോളോ ഡിആര്‍ഡിഎല്‍ ആശുപത്രിയില്‍ പ്രവേശിപ്പിച്ചു. കുട്ടിയുടെ മൃതദേഹം പോസ്റ്റ്‌മോര്‍ട്ടത്തിന് അയച്ചു. സംഭവത്തില്‍ പോലിസ് കേസെടുത്തു. മംഗള്‍ഹട്ട് പോലിസിന്റെ നേതൃത്വത്തിലാണ് കേസ് അന്വേഷണം പുരോഗമിക്കുന്നത്.