പത്താം ക്ലാസ് പരീക്ഷയ്ക്കിടെ വിദ്യാര്ഥി ശൗചാലയത്തില് കുഞ്ഞിന് ജന്മം നല്കി
ഭോപ്പാല്: മധ്യ പ്രദേശിലെ ധാര് ജില്ലയില് പത്താം ക്ലാസ് ബോര്ഡ് പരീക്ഷ എഴുതാനെത്തിയ പെണ്കുട്ടി പരീക്ഷാ കേന്ദ്രത്തില് വച്ച് ആണ്കുഞ്ഞിന് ജന്മം നല്കി. ധാര് ജില്ലയിലെ പിതാംപൂര് സെക്ടര് 1 പോലിസ് സ്റ്റേഷന് പരിധിയിലുള്ള സ്വകാര്യ സ്കൂളിലായിരുന്നു സംഭവം.
പരീക്ഷ എഴുതുന്നതിനിടെ പെണ്കുട്ടിക്ക് കഠിനമായ വയറുവേദന അനുഭവപ്പെട്ടു. തുടര്ന്ന് സ്കൂളിലെ ശൗചാലയത്തില് പ്രവേശിച്ച പെണ്കുട്ടി അവിടെ വച്ചാണ് പ്രസവിച്ചത്. വിവരം അറിഞ്ഞ ഉടന് സ്കൂള് അധികൃതര് പോലിസിനെയും ആരോഗ്യവകുപ്പിനെയും അറിയിച്ചു. ആംബുലന്സിലൂടെ അമ്മയെയും നവജാത ശിശുവിനെയും പിതാംപൂരിലെ സര്ക്കാര് ആശുപത്രിയിലേക്ക് മാറ്റി. ഇരുവരും നിലവില് ആരോഗ്യസ്ഥിതിയില് സുരക്ഷിതരാണെന്ന് ഡോക്ടര്മാര് അറിയിച്ചു.
സംഭവത്തില് ധാര് അഡീഷണല് എസ്പി പരുള് ബെലാപുര്ക്കറുടെ നേതൃത്വത്തില് അന്വേഷണം ആരംഭിച്ചു. അയഞ്ഞ വസ്ത്രങ്ങള് ധരിച്ചാണ് പെണ്കുട്ടി പരീക്ഷാ കേന്ദ്രത്തിലെത്തിയതെന്നാണ് റിപോര്ട്ടുകള് സൂചിപ്പിക്കുന്നത്.
പ്രായപൂര്ത്തിയാകാത്ത പെണ്കുട്ടിയായതിനാല്, പോക്സോ നിയമം ഉള്പ്പെടെ ബന്ധപ്പെട്ട വകുപ്പുകള് പ്രകാരം പോലിസ് കേസ് രജിസ്റ്റര് ചെയ്തു. സീറോ എഫ്ഐആര് രജിസ്റ്റര് ചെയ്ത ശേഷം കേസ് തുടര്നടപടികള്ക്കായി ബെത്മ പോലിസ് സ്റ്റേഷനിലേക്ക് കൈമാറി.
കഴിഞ്ഞ രണ്ടു വര്ഷമായി ഒരാളുമായി പ്രണയത്തിലായിരുന്നുവെന്നും ആ ബന്ധത്തിലൂടെയാണ് ഗര്ഭിണിയായതെന്നും പെണ്കുട്ടി പോലിസിന് മൊഴി നല്കിയതായാണ് റിപോര്ട്ട്. ഗര്ഭിണിയാണെന്ന വിവരം വീട്ടുകാരെ അറിയിച്ചിരുന്നില്ല. പ്രസവശേഷമാണ് കുടുംബാംഗങ്ങള് വിവരം അറിഞ്ഞത്. കുട്ടിയും അമ്മയും ആരോഗ്യവാന്മാരാണെന്നും കൂടുതല് അന്വേഷണം പുരോഗമിക്കുകയാണെന്നും ബന്ധപ്പെട്ട ഉദ്യോഗസ്ഥര് അറിയിച്ചു.