നീതിക്കുവേണ്ടി പോരാടുന്നവരെ അറസ്റ്റുചെയ്യുന്നത് ഭീരുത്വം: ജമാഅത്ത് കൗണ്‍സില്‍
കോട്ടയം: നീതിക്ക് വേണ്ടി പോരാടുന്നവരെ അറസ്റ്റ് ചെയ്ത് നിശബ്ദരാക്കാമെന്നു കരുതുന്നത് ഭീരുത്വമാണെന്ന് കേരള മുസ്‌ലിം ജമാഅത്ത് കൗണ്‍സില്‍ കോട്ടയം ജില്ലാ പ്രസിഡന്റ് എം ബി അമീന്‍ഷാ. ഫാഷിസം ഇന്ത്യയെ തന്നെ കൂച്ചുവിലങ്ങിടുമ്പോള്‍ ശക്തമായ ജനകീയ പ്രക്ഷോഭങ്ങള്‍ ഉയര്‍ത്തിക്കൊണ്ടുവരാന്‍ മതേതര ജനാധിപത്യ വിശ്വാസികള്‍ തയ്യാറാവണം.
ടീസ്ത സെതല്‍വാദ്, ആര്‍ ബി ശ്രീകുമാര്‍ എന്നിവരെ അറസ്റ്റ് ചെയ്ത നടപടി പൗരാവകാശ നിഷേധവും ജനാധിപത്യാവകാശ ലംഘനവുമാണ്. സത്യത്തിന്റെ ചെറുനക്ഷത്രങ്ങളെ കൂടി ഇല്ലാതാക്കാനുള്ള സംഘപരിവാര്‍ ശ്രമം വിലപ്പോവില്ലെന്നും നീതിയും ജനാധിപത്യവും പുലരുന്ന നാള്‍ വരുക തന്നെ ചെയ്യുമെന്നും അദ്ദേഹം പ്രസ്താവനയില്‍ ചൂണ്ടിക്കാട്ടി.