കൊച്ചി: പോപുലര്‍ ഫ്രണ്ട് ഓഫ് ഇന്ത്യ മുന്‍ നേതാക്കളുടെയും പ്രവര്‍ത്തകരുടെയും വീടുകളില്‍ എന്‍ഐഎ പരിശോധന. സംസ്ഥാനത്തെ 56 സ്ഥലങ്ങളിലായിരുന്നു റെയ്ഡ്. പോപുലര്‍ ഫ്രണ്ട് നിരോധനത്തിന്റെ തുടര്‍ച്ചയാണ് പരിശോധനയെന്നാണ് വിവരം. വ്യാഴാഴ്ച പുലര്‍ച്ചെയാണ് റെയ്ഡ് തുടങ്ങിയത്. തിരുവനന്തപുരം ജില്ലയില്‍ തോന്നയ്ക്കല്‍, നെടുമങ്ങാട്, പള്ളിക്കല്‍ എന്നിവിടങ്ങളിലും ആലപ്പുഴയില്‍ ചിന്തൂര്‍, വണ്ടാനം, വീയപുരം, ഓച്ചിറ എന്നിവിടങ്ങളിലും എറണാകുളം ജില്ലയില്‍ ആലുവ, എടവനക്കാട്, വൈപ്പിന്‍ പ്രദേശങ്ങളിലും കൊല്ലം ജില്ലയില്‍ കരുനാഗപ്പള്ളി, ചക്കുവള്ളി എന്നിവിടങ്ങളിലും പത്തനംതിട്ട, കോട്ടയം, മലപ്പുറം, കോഴിക്കോട് ജില്ലകളിലുമാണ് പരിശോധന നടന്നത്. മാസങ്ങള്‍ക്ക് മുമ്പ് രാജ്യവ്യാപകമായി പോപുലര്‍ ഫ്രണ്ട് നേതാക്കളുടെ വീടുകളില്‍ സമാനമായ രീതിയില്‍ എന്‍ഐഎ റെയ്ഡ് നടത്തിയിരുന്നു.