തയ്യാറെടുപ്പുകള് പുരോഗമിക്കുന്നു; താല്കാലിക ബൂത്തുകള് 15 മുന്പ് സജ്ജമാകും
തൃശൂര്: നിയമസഭാ തിരഞ്ഞെടുപ്പിനുള്ള തയ്യാറെടുപ്പുകള് തൃശൂര് ജില്ലയില് അതിവേഗം പുരോഗമിക്കുകയാണെന്ന് തൃശൂര് ജില്ലാ തിരഞ്ഞെടുപ്പ് ഓഫീസര്കൂടിയായ ജില്ലാ കളക്ടര് എസ് ഷാനവാസ് അറിയിച്ചു. ജില്ലയിലെ 1560 ഓക്സിലറി പോളിംഗ് ബൂത്തുകളില് 31 എണ്ണം താത്കാലികമായി സജ്ജമാക്കേണ്ടവയാണ്. ഇവയുടെ നിര്മാണം മാര്ച്ച് 15ഓടെ പൂര്ത്തിയാകും. പുതിയ ബൂത്തുകള് വോട്ടര്മാര്ക്ക് പരിചിതമാകുന്നതിന് വേണ്ടിവരുന്ന സമയം കൂടി കണക്കിലെടുത്താണ് ഇവ നേരത്തെ തയ്യാറാക്കുന്നത്.
റാമ്പുകള്, ടോയ്ലറ്റുകള്, വൈദ്യുതി, വെള്ളം, െ്രെഡനേജുകള്, പ്രവേശിക്കുന്നതിനും മടങ്ങുന്നതിനും പ്രത്യേക കവാടങ്ങള്, ആവശ്യമായ ഫര്ണീച്ചറുകള്, ഹെല്പ്പ് ഡസ്ക് എന്നിവ ബൂത്തുകളില് സജ്ജമാക്കണമെന്നാണ് കേന്ദ്ര തിരഞ്ഞെടുപ്പ് കമ്മീഷന് നിര്ദേശിച്ചിട്ടുള്ളത്. ഇതിനു പുറമെ മാസ്ക്, ഗ്ലൗസ് കോര്ണറുകളും ഒരുക്കേണ്ടതുണ്ട്. റാമ്പുകള് ആവശ്യമുള്ള ബൂത്തുകളില് നിര്മാണം ആരംഭിച്ചിട്ടുണ്ട്. തിരഞ്ഞെടുപ്പിന്റെ രണ്ടു ദിവസം മുന്പ് ഹെല്പ്പ് ഡസ്കും മറ്റു സൗകര്യങ്ങളും ഏര്പ്പെടുത്തും.
ബൂത്തുകളോടനുബന്ധിച്ച് ആവശ്യമായ ബയോ ടോയ്ലറ്റുകള് വേണ്ടതുണ്ട്. ജില്ലാ ശുചിത്വ മിഷന് മുഖേനയാണ് ഇവ സജ്ജീകരിക്കുക. വോട്ടെടുപ്പിന് മുന്പ് എല്ലാ പോളിംഗ് കേന്ദ്രങ്ങളും അണുവിമുക്തമാക്കുകയും ടോയ്ലറ്റുകള് ശുചീകരിക്കുകയും ചെയ്യും.
കൂടുതല് പോളിംഗ് ബൂത്തുകളുള്ള കേന്ദ്രങ്ങള് സാമൂഹിക അകലം ഉറപ്പാക്കുന്നതിനും തിരക്ക് നിയന്ത്രിക്കുന്നതിനും പ്രത്യേക ക്രമീകരണങ്ങള് ഏര്പ്പെടുത്തും. ഇതിനായി സ്റ്റുഡന്റ് പൊലീസ് കേഡറ്റുകളുടെയും വോളണ്ടിയര്മാരുടെയും സേവനം പ്രയോജനപ്പെടുത്തും.
ഭിന്നശേഷിക്കാര്ക്കും എണ്പതു വയസിനു മുകളിലുള്ളവര്ക്കും കോവിഡ് രോഗികള്ക്കും ക്വാറന്റൈയിനില് കഴിയുന്നവര്ക്കും തപാല് വോട്ടു ചെയ്യുന്നതിന് അപേക്ഷ സമര്പ്പിക്കുന്നതിനുള്ള 12 ഡി ഫോറത്തിന്റെ വിതരണം ആരംഭിച്ചിട്ടുണ്ട്. ഭിന്നശേഷി, കോവിഡ് പോസിറ്റീവ്, ക്വാറന്റൈന് വിഭാഗങ്ങളില്പ്പെടുന്നവര് മെഡിക്കല് സര്ട്ടിഫിക്കറ്റ് മുന്കൂട്ടി വാങ്ങിവയ്ക്കേണ്ടതാണ്. തപാല് വോട്ടിന് അര്ഹരെന്ന് വ്യക്തമാക്കുന്ന രേഖകള് ഹാജരാക്കുന്നവര്ക്ക് മാത്രമാണ് ബി.എല്.ഒമാര് 12 ഡി ഫോറം നല്കുക. പൂര്ണമായും പൂരിപ്പിച്ച 12 ഡി ഫോറം തിരിച്ചു നല്കുന്നവരുടെ പേരിനൊപ്പം വോട്ടര് പട്ടികയില് തപാല് വോട്ട് എന്ന് മാര്ക്കു ചെയ്യും. ഇവര്ക്ക് പിന്നീട് പോളിംഗ് ബൂത്തില് പോയി വോട്ടു ചെയ്യാനാവില്ല.
പോളിംഗ് ഉദ്യോഗസ്ഥര് ബൂത്തുകളില് എത്തുന്നതു മുതലുള്ള നടപടികള് ജില്ലാ തിരഞ്ഞെടുപ്പ് ഓഫീസര്ക്ക് കാണാന് കഴിയും വിധമുള്ള ക്രമീകരണങ്ങളാണ് ഏര്പ്പെടുത്തുന്നത്. വെബ് കാസ്റ്റിംഗ് സാധ്യമല്ലാത്ത ബൂത്തുകളില് റെക്കോര്ഡിംഗ് ഉള്ള സിസിടിവി സജ്ജമാക്കും.