കോട്ടയത്ത് കെഎസ്ആര്‍ടിസി ബസും ഗ്യാസ് ലോറിയും കൂട്ടിയിടിച്ചു;ലോറി ഡ്രൈവര്‍ക്ക് ദാരുണാന്ത്യം
കോട്ടയം: ഈരാറ്റുപേട്ട തൊടുപുഴ റോഡില്‍ കളത്തൂക്കടവിന് സമീപം കെഎസ്ആര്‍ടിസി ബസും ഗ്യാസ് മിനിലോറിയും കൂട്ടിയിടിച്ച് ലോറി ഡ്രൈവര്‍ക്ക് ദാരുണാന്ത്യം. മേലുകാവ് സ്വദേശി റിന്‍സ് സെബാസ്റ്റ്യനാണ് മരിച്ചത്.
രാവിലെ 11.30 ഓടെയായിരുന്നു അപകടം സംഭവിച്ചത്.മേലുകാവില്‍ നിന്നും ഗ്യാസുമായി വന്ന ലോറി തൃശൂര്‍ എരുമേലി റൂട്ടില്‍ സര്‍വീസ് നടത്തുന്ന കെഎസ്ആര്‍ടിസി ബസില്‍ ഇടിക്കുകയായിരുന്നു.വാഹനമോടിച്ചിരുന്ന റിന്‍സ് ഇടിയുടെ ആഘാതത്തില്‍ ലോറിയുടെ ക്യാബിനുള്ളില്‍ കുടുങ്ങി പോയി. അപകടത്തിനു പിന്നാലെ റിന്‍സിനെ പുറത്തിറക്കാന്‍ നാട്ടുകാര്‍ ശ്രമിച്ചെങ്കിലും സാധിച്ചില്ല. തുടര്‍ന്ന് ഫയര്‍ ഫോഴ്‌സും പോലിസും സ്ഥലത്തെത്തി വാഹനം വെട്ടിപ്പൊളിച്ചാണ് റിന്‍സിനെ പുറത്തെടുത്തത്.വാന്‍ പൂര്‍ണമായും തകര്‍ന്നു. ബസ് ഡ്രൈവര്‍ക്കും ചില യാത്രക്കാര്‍ക്കും നിസാര പരിക്കുകളുണ്ട്.
മഴയില്‍ നനഞ്ഞു കിടന്ന റോഡില്‍ തെന്നിയ ലോറി ബസില്‍ ഇടിക്കുകയായിരുന്നുവെന്നാണ് പ്രാഥമിക നിഗമനം.