വീഗാലാന്ഡില് വീണു പരിക്കേറ്റയാള്ക്ക് മതിയായ നഷ്ട പരിഹാരം നല്കാത്തതിനെതിരെ കൊച്ചൗസേപ്പ് ചിറ്റിലപ്പിള്ളിക്ക് ഹൈക്കോടതിയുടെ രൂക്ഷ വിമര്ശനം
തൃശൂര് സ്വദേശി വിജേഷ് വിജയന് നല്കിയ ഹരജി പരിഗണിക്കവെയാണ് കോടതി കൊച്ചൗസേപ്പ് ചിറ്റിലപ്പിള്ളിയെ വിമര്ശിച്ചത്.
കൊച്ചി: വീഗാലാന്ഡില് വീണു പരിക്കേറ്റയാള്ക്ക് മതിയായ നഷ്ട പരിഹാരം നല്കാത്തതിനെതിരെ കൊച്ചൗസേപ്പ് ചിറ്റിലപ്പിള്ളിക്ക് ഹൈക്കോടതിയുടെ രൂക്ഷ വിമര്ശനം. തൃശൂര് സ്വദേശി വിജേഷ് വിജയന് നല്കിയ ഹരജി പരിഗണിക്കവെയാണ് കോടതി കൊച്ചൗസേപ്പ് ചിറ്റിലപ്പിള്ളിയെ വിമര്ശിച്ചത്. 2002 ഡിസംബര് 22 നാണ് വീഗാലാന്ഡില് വീണു വിജേഷിന് പരിക്കേറ്റത്.ലോകം ചുറ്റുന്ന ചിറ്റിലപിള്ളി കിടക്കയില് കിടക്കുന്ന വിജേഷിനെ പരിഗണിക്കാത്തത് എന്തുകൊണ്ടാണെന്ന് കോടതി ചോദിച്ചു.എന്നാല് സംഭവം തനിക്ക് നാണക്കേടുണ്ടാക്കിയെന്നും രണ്ടര ലക്ഷം രൂപ നഷ്ടപരിഹാരം നല്കാമെന്നുമാണ് കൊച്ചൗസേപ്പ് ചിറ്റിലപ്പിള്ളി പറയുന്നത്. എന്നാല് എത്ര വര്ഷമായി വിജേഷ് കിടപ്പിലാണെന്നും, അതെന്താണ് കൊച്ചൗസേപ്പ് ചിറ്റിലപ്പള്ളി ഓര്ക്കാത്തതെന്നും കോടതി ചോദിച്ചു. ഇവരൊക്കെ ചെയ്യുന്ന ഇത്തരം കാര്യങ്ങള് ഞെട്ടലുളവാക്കുകയാണ്. ഇത്തരക്കാരെ തുറന്നു കാട്ടുന്ന സംഭവമാണ് ഹരജിയായി എത്തിയിരിക്കുന്നതെന്നും കോടതി പറഞ്ഞു.ചെറിയ സഹായങ്ങള് നല്കി പ്രസിദ്ധീകരിക്കുന്നത് പ്രശസ്തിക്കു വേണ്ടിയാണോയെന്നും കോടതി ചോദിച്ചു. മാനവികത, മനുഷ്യത്വം എന്നിവ ഹൃദയത്തിലാണ് വേണ്ടത്. മതിയായ നഷ്ടപരിഹാരം നല്കിയില്ലെങ്കില് കൊച്ചൗസേപ്പ് ചിറ്റിലപ്പിള്ളി നേരിട്ട് ഹാജരാവേണ്ടി വരുമെന്നും കോടതി പറഞ്ഞു.