തിരുവനന്തപുരം: കോഴിക്കോട് മെഡിക്കല് കോളജിനു സമീപം ആള്ക്കൂട്ട വിചാരണയ്ക്ക് വിധേയനായ ആദിവാസി യുവാവ് കല്പ്പറ്റ പാറവയല് കോളനിയിലെ വിശ്വനാഥനെ മരിച്ച നിലയില് കണ്ടെത്തിയ സംഭവത്തില് നീതി തേടി മുഖ്യമന്ത്രി പിണറായി വിജയന് കോണ്ഗ്രസ് നേതാവ് രാഹുല് ഗാന്ധി കത്ത് നല്കി. കേസില് സമഗ്രവും നിഷ്പക്ഷവുമായ അന്വേഷണം നടത്തണമെന്നും കുടുംബത്തിന് നീതി ഉറപ്പാക്കണമെന്നും രാഹുല് ആവശ്യപ്പെട്ടു.
നേരത്തെ, ആത്മഹത്യാ കേസായി വിശ്വനാഥന്റെ മരണത്തെ കാണരുതെന്നും അന്വേഷണത്തിലെ പിഴവുകള് പരിഹരിക്കണമെന്നും എസ്സി- എസ്ടി കമ്മീഷന് പോലിസിന് നിര്ദേശം നല്കിയിരുന്നു. വിശ്വനാഥന് മരിക്കുന്നതിന് മുമ്പ് ആശുപത്രി പരിസരത്ത് വച്ച് രണ്ട് പേരോട് സംസാരിക്കുന്നതും, പന്ത്രണ്ടോളം പേര് ചുറ്റും കൂടി നില്ക്കുന്നതിന്റെയും സിസിടിവി ദൃശ്യങ്ങള് പോലിസിന് കിട്ടിയിട്ടുണ്ട്.