ഷെഡ്ഡ് കെട്ടുന്നതിനെ ചൊല്ലി സംഘര്‍ഷം: കണ്ണൂരില്‍ എട്ടുപേര്‍ക്ക് പരുക്ക്
സംഘര്‍ഷം ശക്തമായതോടെ പ്രദേശത്ത് വന്‍ പോലീസ് സന്നാഹം ക്യാംപ് ചെയ്യുന്നുണ്ട്.
കണ്ണൂര്‍: ന്യൂമാഹിയില്‍ സിപിഎം ബിജെപി പ്രവര്‍ത്തകര്‍ തമ്മില്‍ സംഘര്‍ഷമുണ്ടാകാന്‍ കാരണം കടലോരത്ത് ഷെഡ് കെട്ടുന്നതുമായി ബന്ധപ്പെട്ട തര്‍ക്കം. സംഘര്‍ഷം ശക്തമായതോടെ പ്രദേശത്ത് വന്‍ പോലീസ് സന്നാഹം ക്യാംപ് ചെയ്യുന്നുണ്ട്. അഴീക്കലിലെ സി.പി.എം. ബ്രാഞ്ച് കമ്മിറ്റി ഓഫീസായ പാട്യം ഗോപാലന്‍ സ്മാരക മന്ദിരത്തിനുനേരേയും ആക്രമണമുണ്ടായി. കഴിഞ്ഞ ദിവസം തുടങ്ങിയ സംഘര്‍ഷത്തില്‍ മൂന്ന് സിപിഎം പ്രവര്‍ത്തകര്‍ക്കും അഞ്ചു ബിജെപി പ്രവര്‍ത്തകര്‍ക്കുമാണ് പരുക്കേറ്റത്. തലക്ക് ഗുരുതരമായി പരിക്കേറ്റ സിപിഎം പ്രവര്‍ത്തകരായ ശ്രീഖില്‍, ശ്രീജിത്ത്, അജിത്ത് എന്നിവരെ തലശ്ശേരി സഹകരണ ആശുപത്രിയില്‍ പ്രവേശിപ്പിച്ചു.
പരുക്കേറ്റ മൂന്ന് ബിജെപി പ്രവര്‍ത്തകരും ആശുപത്രിയില്‍ ചികിത്സ തേടി. അഖില്‍, ലിനീഷ്, ലിജിന്‍ എന്നിവരെയാണ് തലശ്ശേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചത്. പ്രദേശത്തെ ബിജെപി പ്രവര്‍ത്തകനായ പ്രസാദിന്റെ വീടിന് നേരെയും അക്രമം നടന്നു.പസാദിനും ഭാര്യ ജിനക്കും പരിക്കേറ്റിട്ടുണ്ട്.